Қазақстан мектептерінде «Адал азамат» бағдарламасы аясында жаңа дизайн енгізіліп жатыр. Бұл туралы Оқу-ағарту министрлігінің баспасөз қызметі мәлім етті, деп хабарлайды F16.kz.
Бағдарламаны көрнекі түрде түсіндіру үшін арнайы заманауи брендбук әзірленген. Онда негізгі құндылықтар, түстер үйлесімі, безендіру үлгілері мен мектеп ішін жаңа форматта рәсімдеуге арналған шешімдер қамтылған.
Министрлік мәліметінше, осы құжат негізінде білім беру ұйымдарына ортақ дизайн-код бекітіліп, мектептердің ішкі кеңістігі кезең-кезеңімен жаңартылып жатыр. Онда бағдарламаның алты басты құндылығын көрсететін элементтер қарастырылған. Сондай-ақ пән кабинеттері оқушылардың жасына және пән ерекшелігіне сай безендірілуге тиіс.
Алғашқы кезеңде жоба 530 мектепте енгізіледі. Қазірдің өзінде 267 білім орнында қажетті көрнекі элементтер орнатылып қойған. Алдағы уақытта бұл жұмыс жөндеуден өтетін мектептерде жалғасып, кейін барлық білім беру ұйымдарына таратылады.
Айта кетейік, брендбук – өзгеріп, толықтырылып отыратын құжат. Ол әр мектептің ерекшелігіне қарай үнемі жетілдіріліп отырады.
