Астанада семсерлесуден әлем кубогының кезеңі басталды. Бұл – Қазақстан үшін тарихи жарыс. Себебі мұндай деңгейдегі турнир елде алғаш рет өтіп, әлемнің үздік спортшылары елордада бас қосты, деп хабарлайды F16.kz.
Ұлттық олимпиадалық комитеттің мәліметінше, Халықаралық семсерлесу федерациясы қолдау көрсеткен дода бұрын Швейцария, Германия, БАӘ және Канадада ғана ұйымдастырылып келген. Биыл Қазақстан осы тізімге қосылып, Орталық Азияда әлем кубогын қабылдаған алғашқы ел атанды.
Жарысқа 222 әйел, 272 ер спортшы қатысып жатыр. Командалық сайыста 31 ерлер және 23 әйелдер құрамасы бақ сынайды. Жалпы қатысушылар саны жаттықтырушылар мен төрешілерді қоса есептегенде 1000-нан асады.
Қазақстан құрамасы бұл додаға 30 спортшы қосты. Олардың қатарында шығысқазақстандық тәжірибелі семсерлесуші Руслан Курбанов, Эльмир Әлімжанов, Ерлік Сертай, Кирилл Проходов және Вадим Шарлаимов бар. Әйелдер құрамасында 24 спортшы сынға түседі. Негізгі үміт артылатындар – Ульяна Писцова, София Николайчук, Каролина Фомина және Владислава Андреева.
Команда капитаны Эльмир Әлімжановтың айтуынша, өз алаңында өнер көрсету спортшыларға үлкен жауапкершілік жүктейді. Жарыс алдында Астанада халықаралық оқу-жаттығу жиыны өтіп, оған бірнеше елдің спортшылары қатысқан.
Әлем кубогының Қазақстанда, өз елімізде өтуі бізге ерекше толқу мен үлкен жауапкершілік жүктейді. Турнир алдында Qazaqstan жеңіл атлетикалық спорт кешенінде нәтижелі оқу-жаттығу жиынын өткіздік. Оған 7-ден астам елдің спортшылары қатысты. Бұл жарыс алдындағы дайындықтың маңызды кезеңіне айналды. Бүгіннен бастап жарысты бастадық. Өз тарапымыздан ел намысын лайықты қорғау үшін бар күшімізді саламыз, — деп атап өтті команда капитаны.
Айта кетейік, наурыз айының басында Руслан Курбанов Германиядағы әлем кубогы кезеңінде алтын медаль жеңіп алған. Ол финалда италиялық Давиде Ди Веролиді жеңген еді.
Астанадағы додаға әлемдік жұлдыздар да жиналды. Олардың қатарында Олимпиада чемпиондары мен әлем біріншілігінің жеңімпаздары бар. Командалық сайыста Франция, Италия, Жапония және Мысыр құрамалары негізгі фаворит саналады. Дегенмен кейінгі жылдары тұрақты нәтиже көрсетіп жүрген Қазақстан құрамасы да жүлдеден үмітті.
Жарыс төрт күнге жалғасады. 28 наурызда жеке сайыстардың финалдары өтсе, командалық бәсекелер 29 наурызға жоспарланып отыр.
