Өскеменде қала тұрғындары мен қонақтарының сүйікті демалыс орнына айналған жерлердің бірі – «Қазақстан» тауы. Онда түрлі шаралар мен флешмобтар ұйымдастырылып, жарқыраған қала көрінісіне суретке түсу үшін туристер жиі келеді. Алайда демалыс орнының көрінісі көпшіліктің көңілінен шықпайды, деп хабарлайды F16.kz.
Шашылған қоқыс таудың көркін қашырып тұр. Ал, келушілер үшін қарапайым жағдай да жасалмағаны, санитарлық тораптар орнатылмаған, орындықтар аз.
Шығыс Қазақстан облысының әкімі Нұрымет Сақтағанов демалыс орны аумағындағы мәселелерді шешуді тапсырды.
Біз «Қазақстан» тауын серуендейтін алаң ретінде емес, қаланың бет-бейнесі ретінде қарауымыз керек. Онда Мемлекеттік рәміздеріміз орнатылған. Туристер мен тұрғындар жиі баратын жерге қолайлы жағдай жасалуға тиіс, — деді аймақ басшысы.
Қазақстан Республикасы Үкіметінің отырысында Мемлекет басшысының «Таза Қазақстан» экологиялық бастамасын іске асыру мәселесі қаралды. Осы жиында Нұрымбет Сақтағанов «Қазақстан» тауын абаттандыру бойынша бірқатар нақты тапсырма берді.
Санитарлық-гигиеналық модульдер жедел орнатылсын, аумақты тұрақты түрде тазалауға мән беру керек. Қосымша орындықтар мен қоқыс жәшіктері орнатылып, жайлы демалыс үшін жағдай жасалсын. Өскемен қаласының әкімдігіне, ішкі саясат басқармасы жастар ұйымдарымен бірлесіп және облыстық энергетика және ТҮКШ басқармасына тапсырма беремін, — деді облыс әкімі.
Сондай-ақ жұмыстардың мерзімі мен орындалуы қатаң бақылауда болатынын атап өтті.
