Елордада өтіп жатқан Өңірлік экологиялық самитте Қазақстан Президенті Қасым-Жомарт Тоқаев елдегі экологиялық саясаттың негізгі бағыттары мен басымдықтары туралы айтты. Мемлекет басшысы қоршаған ортаны қорғау мәселесі елімізде заңнамалық деңгейде ерекше мәнге ие екенін атап өтті, деп хабарлайды F16.kz порталы Ақорданың баспасөз қызметіне сілтеме жасап.
Президенттің айтуынша, жаңа Конституцияда экологияны қорғау мемлекеттік саясат пен азаматтық жауапкершіліктің басты қағидаттарының бірі ретінде бекітілген.
Біз үшін экологиялық қауіпсіздік пен өсіп-өркендеу жай ғана мәселе емес. Ол ұлттық сана-сезімнің ажырамас бөлігі және ұзақмерзімді даму стратегиясының арқауы ретінде қарастырылады, – деді Қасым-Жомарт Тоқаев.
Мемлекет басшысы Қазақстанда экология саласында бірқатар нақты бағыт бойынша жүйелі жұмыс жүргізіліп жатқанын жеткізді. Атап айтқанда, елде экологиялық таза энергия көздеріне көшу, биоалуантүрлілікті сақтау, тозған жерлерді қалпына келтіру және су ресурстарын тиімді басқару бағыттары басымдыққа ие.
Сонымен қатар су үнемдеу саясатын енгізу және қоршаған ортаны қорғау саласындағы өңірлік ынтымақтастықты нығайту шаралары да қолға алынған.
Президент экологиялық мәселелерді шешудегі халықаралық ынтымақтастықтың маңызына да тоқталды.
Әлбетте, ешбір ел жалғыз жортып, табысқа жете алмайды. Сондықтан аймақтық және жаһандық деңгейде күш жұмылдыруға баса мән береміз, – деді Тоқаев.
Президенттің сөзінше, қойылған міндеттер нақты жобалар арқылы, жаңа технологияларды енгізу және тұрақты дамуға бағытталған ұзақмерзімді инвестициялар есебінен іске асырылмақ.
