Қазақстан Ұлттық банкі алаяқтықтың жаңа түрі пайда болғанын хабарлады. Қаскөйлер адамдарға «несие мәртебесі жаңартылды» деген мазмұнда күмәнді SMS-хабарламалар жіберіп жатыр.
Мамандардың айтуынша, мұндай хабарламаларда нақты қай қаржы ұйымынан келгені көрсетілмейді. Бұл тәсіл тосын әсерге негізделген: тіпті адам ешқандай несие рәсімдемесе де, хабарлама оны асығыс әрекет етуге итермелейді.
Сілтемені басқан жағдайда қолданушы банк немесе микроқаржы ұйымының ресми сайтына ұқсатып жасалған жалған парақшаға тап болады. Онда логин, телефон нөмірі, жеке куәлік деректері, банк картасының мәліметтері секілді құпия ақпаратты енгізу сұралады. Кей жағдайда сілтеме зиянды файл жүктеуге бағыттап, құрылғыға бақылау орнатуға жол ашуы мүмкін.
Осыған байланысты Ұлттық банк азаматтарға күмәнді сілтемелерге өтпеуге кеңес береді. Қажет болған жағдайда несие тарихын тек ресми көздер — мемлекеттік кредит бюросының сайты немесе электронды үкімет порталы арқылы тексеру ұсынылады.
