Қазақстанда әлеуметтік тұрғыда осал санатқа жататын азаматтар мен төтенше жағдайлардан зардап шеккен адамдарға қарыз төлеу мерзімін кейінге шегеру мүмкіндігі ұсынылып отыр. Бұл жөнінде Қаржы нарығын реттеу және дамыту агенттігі мәлімдеді, деп хабарлайды F16.kz.
Агенттік банк несиелері мен микрокредит шарттарына қатысты өзгерістер мен толықтырулар енгізіп, құжатты «Ашық НҚА» порталында жариялады. Онда ұсынылған жаңа ережелер қаржы нарығын жетілдіру, тұтынушылардың құқықтарын қорғау және артық заңнамалық шектеулерді болдырмау мақсатында әзірленгені айтылған.
Жаңа тәртіпке сәйкес, табысын жоғалтқан немесе азайтқан азаматтар, егер олар әлеуметтік осал топқа жатса немесе төтенше жағдай салдарынан зардап шеккен болса, қарызын өтеуді үш айға дейін кейінге қалдыруға өтініш бере алады. Бұл ретте ешқандай комиссия немесе қосымша шығын талап етілмейді. Төлемді шегеру үшін тиісті жағдайларды растайтын құжаттарды ұсыну қажет.
Сонымен қатар, енгізілген өзгерістер банктер мен микроқаржы ұйымдарының қарыз шарттарына өзгеріс енгізу кезінде ашықтық пен бірізділікті қамтамасыз етуге бағытталған.
Агенттік бұл шаралар қарыз алушылардың борыш жүктемесін азайтып, несиелік келісімдерді реттеуді жеңілдетуге көмектеседі деп отыр.
