Еліміздің бірнеше өңірінде көші-қон заңнамасын бұзған шетел азаматтары анықталды. Олардың бір парасы Шығыс Қазақстан облысында заңсыз жұмыс істеген. Бұл туралы республика көлемінде өткен «Мигрант» жедел-профилактикалық іс-шарасы асында белгілі болды, деп хабарлайды F16.kz.
Ішкі істер министрлігінің мәліметінше, акция кезінде 7 мыңнан астам құқық бұзушылық анықталды:
- 4,1 мың шетел азаматы елде болу тәртібін бұзғаны үшін әкімшілік жауапқа тартылды;
- 2,7 мың шетел азаматы заңсыз еңбек қызметі үшін жауапқа тартылды;
- 2,2 мың қазақстандық пен заңды тұлға полицияға шетелдіктер туралы хабарламағаны үшін жауапкершілікке тартылды;
- 500-ден астам жұмыс беруші заңсыз шетелдік еңбек күшін пайдаланғаны үшін жауапқа тартылды.
Салынған айыппұлдардың жалпы сомасы 200 млн теңгеден асты. Сонымен қатар 1,5 мың шетел азаматының елде болу мерзімі қысқартылып, 1,2 мың құқық бұзушыны елден шығару туралы сот шешімі шығарылды. 121 адам мәжбүрлі түрде елден шығарылып, олардың барлығына Қазақстанға 5 жыл кіруге тыйым салынды. 8 адам деструктивті-радикалды ағым өкілі болып шықты.
Іс-шара барысында 24 қылмыстық іс қозғалды:
- 9 іс – мемлекеттік шекараны заңсыз кесіп өту;
- 9 іс – заңсыз көші-қонды ұйымдастыру;
- 6 іс – шетелдік жұмыс күшін тарту қағидаларын бұзу.
Талдау нәтижесі көрсеткендей, шетелдіктердің заңсыз әрекетіне кейде Қазақстан азаматтары өздері ықпал етеді, негізінен жылдам пайда табуға ұмтылу себеп болып отыр. Шымкент, Алматы, Жамбыл және Шығыс Қазақстан облыстарында шетелдік жұмыс күшін заңсыз тарту деректері бірнеше рет тіркелді. Сонымен қатар бір өңірде Қазақстан азаматы жалған құжат арқылы шетелдіктерді заңдастырған, бұл факті бойынша сотқа дейінгі тергеу жүргізіліп жатыр.
Акция барысында іздеуде жүрген 22 шетел азаматы ұсталды.
