Үкімет отырысында көлік министрі Нұрлан Сауранбаев елдегі автожол жүйесін цифрландыру бағытында атқарылып жатқан жұмыстар туралы айтты, деп хабарлайды F16.kz.
Министрдің айтуынша, e-Joldar ақпараттық платформасы шеңберінде республикалық маңызы бар жолдардың цифрлық паспорттары әзірленіп жатыр. Бұл құжаттар жолдардың техникалық жағдайын толық сипаттап қана қоймай, болашақта жүргізушісіз көліктерді пайдалануға құқықтық және инфрақұрылымдық негіз қалыптастырады.
Сауранбаевтың мәліметінше, жолдарды жасанды интеллект көмегімен жыл сайын диагностикалау тәжірибесі қалыптасып келеді. Бұл әдіс жол жабынының тозуын уақтылы анықтауға және жөндеу жұмыстарын тиімді жоспарлауға мүмкіндік береді.
Сондай-ақ жол төсемінің сақталуын бақылау үшін 220 автоматтандырылған өлшеу бекетін орнату жоспарланған. Бүгінде олардың 71-і жұмыс істей бастады. Бұл құрылғылар ауыр жүк көліктерінің нормативтен тыс салмақпен жүруін анықтап, жолдардың мерзімінен бұрын бұзылуына жол бермеуге бағытталған, – деді Сауранбаев.
