Әлеуметтік желіде азаматтың жеке деректері жаппай тарағаны туралы ақапарат жарияланды. Оған жауапты ҚР Цифрлық даму, инновациялар және аэроғарыш өнеркәсібі министрлігі ресми мәлімдеме жасады, деп хабарлайды F16.kz.
Telegram-дағы SecuriXy_kz арнасы таратқан ақпаратқа сүйенсек, 16 млн 300 мың қазақстандықтың жеке деректері бар CSV-файл табылды. Кестеде толық аты-жөнінен бөлек, жынысы, туған күні, идентификатор, ЖСН, телефон нөмірі, азаматтығы, ұлты, мекенжайы мен сол мекенжайда неше жыл тұрып жатқаны сияқты мәліметтер көрсетілген.
Министрлік мәлімдеме жасады
ЦДИАӨМ Ақпараттық қауіпсіздік комитеті құқық қорғау және арнайы органдармен бірлесіп, тексеру басталғанын хабарлады.
Алғашқы талдау бұл деректердің мемлекеттік емес, яғни жекеменшік ақпараттық жүйелерден алынуы мүмкін екенін көрсетті. Қазіргі таңда мемлекеттік ақпараттық жүйелерге жасалған кибершабуыл немесе деректердің таралу фактілері тіркелген жоқ, — делінген ведомство хабарламасында.
Министрлік тексеру толық аяқталғанға дейін қандай да бір қорытынды жасауға ерте екенін ескертті. Сонымен қатар азаматтардың дербес деректері таралған жағдайда, бұл туралы eGov порталы арқылы жеке кабинеттеріне хабарлама жолданады.
Айта кетейік, бұған дейін де осындай осыған ұқсас деректер таралып, жарияланған мәліметтер ескі ақпараттық базалардан — негізінен қызмет көрсету салалары мен микроқаржы ұйымдарынан алынғаны анықталған.
Министрлік бұл жағдайды бақылауда ұстап отыр және қосымша ақпарат тексеру нәтижелері бойынша жарияланатынын мәлімдеді.
