Шығыс Қазақстан облысының полиция департаменті «Казцинк» ЖШС аумағында болған төтенше жағдайға байланысты сотқа дейінгі тергеу бастады. Бұл туралы департаменттің баспасөз қызметі хабарлады, деп жазады F16.kz.
Құзырлы органның мәліметінше, қылмыстық іс ҚР Қылмыстық кодексінің 156-бабы, 4-бөлігі (абайсызда екі немесе одан да көп адамның өліміне әкеп соққан еңбекті қорғау талаптарын бұзу) бойынша қозғалған.
Оқиға орнында жедел-тергеу топтары жұмыс істеп жатыр.
Қазір оқиғаның мән-жайын анықтауға бағытталған алғашқы кезектегі іс-шаралар жүргізілуде. Полиция департаменті тарапынан оқиғаны жан-жақты, толық және объективті зерттеу үшін барлық қажетті шаралар қабылданады, — деп хабарлады ШҚО ПД баспасөз қызметі.
Сондай-ақ полиция қызметкерлері тергеу мүддесіне байланысты өзге мәліметтер жария етілмейтінін атап өтті. Бұл талап қылмыстық-процестік заңнаманың нормаларына сәйкес сақталып отыр.
Еске сала кетейік, бұған дейін кәсіпорын аумағында болған жарылыс салдарынан екі жұмысшы қаза тауып, бес адам жарақат алғанын жазғанбыз.
