2025 жылғы 3 қарашадан «АСТАНА-1» (Keden) ақпараттық жүйесінің «Тауарларға арналған декларация» модулін барлық кедендік рәсімдер бойынша сынақтан өткізу басталады, деп хабарлайды F16.kz.
Сынақ онлайн және офлайн форматтарда жүргізіледі. Кез келген тұлғалар сынаққа қатыса алады. Өтінім беру тәртібі мен сынақ өткізілетін кесте «АСТАНА-1» (Keden) ақпараттық жүйесінің https://test-keden.kgd.gov.kz тесттік порталында жарияланған. Ол жерде сынақты өткізу тәртібі, бейнесабақтар, пайдаланушы нұсқаулығы, жиі қойылатын сұрақтарға жауаптар, байланыс деректері, сондай-ақ «Тауарларға арналған декларация» модуліне қатысты ескертулер мен ұсыныстарды жіберу функциясы туралы ақпарат бар.
«Тауарларға арналған декларация» модулін іске қосу жобалық мерзімі келер жылғы қаңтардың екінші онкүндігіне жоспарланған. Сонымен қатар модульді іске қосу ұсынылған ескертулер мен ұсыныстарды қаперге ала отырып жүзеге асырылады.
Айта кетейік, Еуразиялық экономикалық комиссия алқасының 2023 жылғы 30 мамырдағы №75 «Тауарларға арналған декларация мен тауарларға арналған декларацияны түзету құрылымы мен форматы туралы және Кеден одағы комиссиясы мен Еуразиялық экономикалық комиссия алқасының кейбір шешімдеріне өзгерістер енгізу туралы» шешімін іске асыру мақсатында «АСТАНА-1» (Keden) ақпараттық жүйесінде тауарларға арналған декларация форматы іске асырылды.
Өзгерістер кедендік рәсімдерді автоматтандыруды және оңайлатуды, сондай-ақ қағаз түріндегі құжаттарды цифрлық форматқа көшіруді көздейді. Атап айтқанда, декларантқа жолданатын барлық сұрау түрлері, ТД-ға өзгерістер енгізу туралы талап/шешім нысаны, ТД-ға өзгерістер нысаны және басқа да құжаттар автоматтандырылды.
