Келер жылдың басында Өскемендегі Сәтпаев, Есенберлин даңғылдары мен Жібек жолы, Базовая көшелерінің қиылысында салынып жатқан жол айырығының бірінші кезеңі аяқталып, көліктер оңға бұрылатын жолмен жүре бастайды, деп хабарлайды F16.kz.
Нәтижесінде Ертіс көпірі жағынан келе жатқан көліктер Жібек жолы көшесіне бұрылу үшін кеңейтілген жолақпен бағдаршамға кідірмей жүре береді. Базовая көшесімен келе жатқан көліктер Сәтпаев даңғылымен Ертіс көпіріне қарай жүру үшін оңға бұрылатын жолға түсуі керек. Бұл бағыттағы жол да кеңейтілген. Сол сияқты Есенберлин даңғылынан Сәтпаев даңғылына, Сәтпаев даңғылынан Базовая көшесіне түсу үшін оңға бұрылатын жолмен жүру жеткілікті. Бағдаршамға тоқтау қажет емес.
«Неке сарайы» аялдамасы уақытша алынады.
Көлік қозғалысын ширата түсу үшін оңға бұрылу жолдары ресми түрде ашылады. Оңға бұрылу жолдарын айналма қозғалыспен бірге іске қосу көзделген еді, бірақ ол келер жылғы қаңтарға шегерілді. – деп хабарлады ШҚО ПД баспасөз қызметі.
2026 жылғы қаңтарда жобаның бірінші кезеңі аяқталады. Яғни, оңға бұрылу жолдары мен айналма жолдың құрылысы толық бітеді. Осыдан кейін аталған жолмен көліктер жүре бастайды. Ал екі деңгейлі жол айырығы келер жылдың соңына қарай толық іске қосылады деп жоспарланып отыр.
