Шығыс Қазақстан облысында «Келешек мектептері» ұлттық жобасы аясында жалпы сыйымдылығы 3 мың орынға шақталған жеті заманауи мектептің құрылысы аяқталып, білім басқармасының қарамағына өткізілді, деп хабарлайды F16.kz.
Білім мекемелері қайда салынды?
Барлық нысан жаңа оқу жылында оқушыларға есігін айқара ашты. Құрылыс, сәулет және қала құрылысы басқармасы басшысының орынбасары Ерназ Мұқатаевтың айтуынша, былтыр Өскемен, Риддер, Шемонаиха, Зайсан қалаларында және Глубокое ауданының Белоусовка кентінде бес мектеп бой көтерсе, 2025 жылы Өскеменде және Опытное поле ауылында тағы екі білім шаңырағы ашылды. Сондай-ақ, Алтай ауданының Жаңа Бұқтырма кентінде жаңа білім ұясы өз жұмысын бастады.
Қандай артықшылықтар бар?
Жаңа оқу орындарының ерекшелігі – бастауыш және жоғары сынып оқушыларына арналған жеке блоктардың болуы. Бұл балалардың қауіпсіздігі мен жайлылығын қамтамасыз етеді. Мектептерде психолог пен логопед кабинеттері, биотехнология және STEM зертханалары, хореография залдары, коворкинг аймақтары, сондай-ақ әр жастағы балаларға арналған бөлек спорт залдары жабдықталған.
Арнайы білімді қажет ететін балалар үшін толыққанды кедергісіз орта жасалған: пандустар, лифтілер және инклюзивті сыныптар қарастырылған.
Жаңа мектептерде бүгінде 3788 оқушы білім алады, оларға 275 білікті педагог тәлім береді. Оқу орындары заманауи цифрлық технологиялармен, интерактивті панельдермен және физика, химия, биология кабинеттерімен жабдықталған.
Инновацияның игілігі
Білім беру инфрақұрылымын дамыту аясында Ы.Алтынсарин атындағы ұлттық білім академиясы жанынан «Келешек мектептері» басқару институты құрылды. Оның мақсаты – дәстүрлі сыныпқа бағытталған үлгіден оқушыға бағытталған жаңа модельге көшу. Бұл процесте жасанды интеллект мүмкіндіктері мен педагогтардың ұжымдық жауапкершілігі кеңінен қолданылмақ. Институт аясында «AI lab» зертханасы іске қосылып, инновациялық оқу ресурстарын әзірлеу және үлкен деректерді талдау бағыттары дамытылады.
Жатақханасы бар мектеп салынады
Болашақта өңірде тағы төрт мектеп салу көзделген. Оның ішінде 1200 орындық жатақханасы бар облыстық «Білім-Инновация» лицейі және Өскемен қаласының жаңа шағын аудандарында бой көтеретін білім ошақтары бар.
