Қиын-Керіш шатқалын ғалымдар «Әлемнің сегізінші кереметі» десе, жер бедерінің қызық пішіндеріне байланысты ел ауызында «Рухтар қаласы», «Екінші Марс», «Жалынды жартастар» аталып кеткен. Жұмбағы мен тылсымы көп мекенге барған әр адам ерекше тыныштықты сезінеді. Шатқалда динозаврлар мен алғашқы сүтқоректілердің дәуіріндегі ежелгі омыртқалы жануарлардың тасқа айналған қалдықтары мен аңдардың сүйектері жиі кездеседі.
Зайсан ойпатындағы бірегей геологиялық ескерткіш 300 гектар жерді алып жатыр. «Мұнда әр келген сайын керіштер әр қырынан көрінеді», – деп жазады жазушы Борис Щербаков. Топырақтың сазды құрылымына байланысты жер бедері қатты жел немесе жаңбырдың әсерімен өзгеріп отырады.
Күршім ауданына қарасты бұл тылсым мекен өзге өңірлер үшін қатты танымал деп айта алмасымыз анық. Десе де, жылына 10-20 мыңға жуық тұрғын ат басын бұратын көрінеді.
Айта кетейік, Шығыс Қазақстан облысының әкімі Нұрымбет Сақтағанов ішкі және шетелдік туристерді тартуға қабілетті маршруттар мен нысандарды анықтауды және ретке келтіруді тапсырған. Бүгінде ауданда осы бойынша жұмыстар жүргізіліп келеді.
Қиын-Керіш шатқалын дамытуды 2009 жылдан бері Күршім ауданын кешенді дамыту жоспарына кіргізіп келеміз. Біздің есеп бойынша, жылына 10-20 мың адам осында келіп демалады. Шет мемлекеттерден, Ресей, Бельгия, Аустралия, Америкадан да туристер келіп, әсерін әлеуметтік желілерде бөлісіп жатады. Елімізге белгілі кәсіпкер Марғұлан Сейсенбай 2009 жылы келіп, шатқалды өзінің туристік маршрутына енгізген. Қазіргі уақытта еліміздің әр түкпірінен баггимен турист әкеліп, қыдыртады, – дейді Күршім аудандық кәсіпкерлік және ауыл шаруашылығы бөлімінің басшысы Ришат Исқақов.
Аудан әкімдігінің айтуынша, шатқалдың маңайында 6 учаске анықталып, туристік үйлер салу үшін аукцион арқылы беруге дайындалған. Алайда инвестор әлі табылған жоқ.
Бір компаниямен келісіп, олар заманауи үйлер мен этноауыл салуды жоспарлап, жобасы жасалып, бекітілген де болатын. Алайда компанияның ішкі мәселелеріне байланысты жоба іс жүзінде жүзеге асырылған жоқ. Былтырдан бастап Аманат ауылында өзге өңірлерден көшіп келген азаматтарға туристік қонақ үйлер ашу бойынша ұсыныс білдірдік. Олар келісті. Бүгінде екі үй таңдап бердік. Тұрғындар алдағы уақытта оны жөндеп, туристерді қабылдауға дайындайды. Егер болашақта сұраныс артып, туристер саны көбейіп жатса, оны кеңейтіп, Қиын-Керішке жақындату да ойда бар, – деді аудандық кәсіпкерлік және ауыл шаруашылығы бөлімінің басшысы.
Бүгінде шатқалда интернет ұстамайды, тоқ тартылмаған. Бұл мәселелер де алдағы жылдары шешімін табуы мүмкін.
Биыл цифрландыру басқармасы келіп, Starlink орнату бойынша орындар белгіленген. 2027 жылы интернет қосылуға тиіс. Биыл аудан әкімінің қолдауымен екі самалжай мен арнайы белгілер орнатылды. Алдағы уақытта да бұл жұмыстар жалғасын табады, – деп атап өтті әкімдік өкілі.
Яғни тұмса табиғатымен ерекшеленетін Шығыс Қазақстан облысына алдағы жылдары келетін туристер саны бұрынғыдан да артуы мүмкін.
