Шығыс Қазақстан облысында экологиялық мәдениетті қалыптастыруға, елді мекендердің тазалығын сақтауға және қоғамдық орындарды абаттандыруға бағытталған «Таза Қазақстан» республикалық экологиялық акциясы жалғасы жатыр. Полиция қызметкерлері де абаттандыру ережелері мен қоғамдық тәртіптің сақталуын қатаң бақылауға алды, деп хабарлайды F16.kz.
Жыл басынан бері «Таза Қазақстан» акциясы аясында полицейлер 6 мыңға жуық әкімшілік құқық бұзушылық дерегін тіркеген.
Оның ішінде 4,8 мыңға жуығы аумақтарды абаттандыру ережелерін бұзуға қатысты болса, тағы бір мыңнан астамы қоғамдық орындарын ластауға байланысты. Сонымен қатар облыс аумағында 120-дан астам рұқсат етілмеген қоқыс үйінділері анықталып, әрбір факті бойынша тиісті шаралар қабылданды, — дейді департаменттің баспасөз қызметі.
«Таза Қазақстан» акциясынын басты мақсаты – толтырылған әкімшілік материалдардың саны емес, тазалық пен саналы жауапкершілік мәдениетін қалыптастыру. Өйткені таза аула, көше немесе саябақ әрбір адамның қарапайым әрекетінен басталады.
Шығыс Қазақстан облысы Полиция департаменті өңір тұрғындары мен қонақтарын «Таза Қазақстан» акциясын қолдауға шақырады.
