Премьер-министрдің орынбасары Қанат Бозымбаев су тасқыны қаупі жоғары кезеңге дайындық барысын тексерді. Арнайы кеңесте өңірлердегі су шаруашылығы нысандарының, жолдар мен көпірлердің жағдайы, сондай-ақ жедел қызметтердің дайындығы қаралды, деп хабарлайды F16.kz.
Осыған дейін не істелді?
Көктемгі су тасқыны қаупі жоғары аймақтардың бірі – Шығыс Қазақстан облысы. Өңірде төтеден төнер қауіптің алдын алу бағытында ауқымды жұмыстар атқарылып жатыр. Қорғаныс бөгеттері салынып, өзен арналары тазартылды, көпірлерге күрделі жөндеу жүргізілді. Су өткізу құрылыстары жаңартылып, дренаж жүйелері ретке келтірілді.
Жалпы республика бойынша 800 шақырымнан астам қорғаныс бөгеті салынды, 1 мың шақырымнан артық арықтар мен каналдар жөнделді. Су тасқыны қаупі бар учаскелерде өзен арналарын тереңдету, жағалауды бекіту және тазалау жұмыстары жалғасып жатыр.
1 наурыз — межелі мерзім
«Қазгидромет» деректеріне сәйкес, биыл көктемде жауын-шашын мөлшері нормадан жоғары болуы мүмкін. Осыған байланысты Қанат Бозымбаев Шығыс Қазақстан, Абай және басқа да бірқатар өңірде қауіпсіздік шараларын күшейтуді тапсырды.
Вице-премьер әкімдіктерге өзен арналары мен су бұру жүйелерін тазалау, қарды уақтылы шығару, қажет болған жағдайда өзендегі мұзды жару жөнінде нақты тапсырмалар берді.
Сондай-ақ су қоймаларының жағдайын тұрақты бақылауда ұстау, төтенше жағдайға дайындық оқу-жаттығуларын өткізу және халықты эвакуациялау жоспарын пысықтау міндеттелді.
Қанат Бозымбаев су тасқынының қауіпсіз өтуін қамтамасыз етуге бағытталған барлық дайындық шараларын 1 наурызға дейін толық аяқтауды тапсырды.
Көктемнің басы жылы әрі жауын-шашынды болады деп болжам жасалып отыр. Былтыр күзде толассыз жауған жаңбыр бірқатар өңірде жер бетінде тоң түзілуіне әкелді, бұл су тасқыны жағдайын қиындатуы мүмкін. Осыған байланысты бәріне дайын болып, қажетті шараларды алдын ала қабылдау маңызды, – деп атап өтті Қанат Бозымбаев.
Жасанды интеллект көмекке келеді
Вице-премьер Жасанды интеллект министрлігіне мүдделі мемлекеттік органдармен бірлесіп, Tasqyn жүйесінде өңірлердегі ықтимал жағдайды моделдеуді, Talsim жүйесінің деректерін интеграциялау және әлеуеті нашар елді мекендерді айқындауды тапсырды.
Төтенше жағдайлар министрлігіне «Көктем-2026» оқу-жаттығуын алдын ала өткізу, су тасқыны жағдайы күрделенген кездегі іс-қимыл алгоритмдерін пысықтау, су тасқынына қарсы іс-шараларды үйлестіруді және азаматтық қорғаудың мемлекеттік жүйесінің күштері мен құралдарының дайындығын қамтамасыз ету жүктелді.
Ішкі істер министрлігімен бірлесіп, су басу қаупі туындаған жағдайда халықты уақытылы эвакуациялау мәселелерін пысықтау, сондай-ақ азық-түлік, жанар-жағармай, дәрі-дәрмек және басқа да тіршілікті қамтамасыз ету құралдарының қажетті қорын қалыптастыру, әсіресе көлік қатынасы үзілуі мүмкін елді мекендерде, тапсырылды. Қосымша инертті материалдар, топырақ толтырылған қаптар қоры және инженерлік техниканың резерві жасалуға тиіс.
