Таяуда Марқакөл қорығының қызметкерлері көл аумағында үлкен суқұзғындардың есебін жүргізді. Оған қорық инспекторы Николай Краснопеев, ғылыми бөлім қызметкерлері Айым Оралғазина мен Ақнұр Дүсіпова қатысты, деп хабарлайды F16.kz.
Кейінгі жылдары аталған құстың саны Марқакөл көлінде еселеп өскен. Бұл жағдай қорықшыларды ғана емес, барша табиғат жанашырларын алаңдатып отыр. Өйткені суқұзығын негізінен балықпен қоректенеді, ал олардың шектен тыс көбеюі көл байлығына қауіп төндіреді. Сондықтан “балықшы” құстардың есеп-қисабын жүргізу маңызды.
Үлкен суқұзғын балықпен қоректенеді, сондықтан ол Марқакөлдің балық қорына айтарлықтай әсер етеді. Олардың саны әр жылдары әртүрлі болады. Соңғы есеп нәтижелері бойынша суқұзғындар саны былтырғымен салыстырғанда едәуір артып, шамамен үш мыңға жуықтады. Бұл – үш есе көп, – деді Марқакөл қорығының қызметкерлері.
Мамандардың айтуынша, суқұзғын тұқымдасына жататын құстар теңіздің, өзен-көлдердің жағалауында, сондай-ақ сулы-батпақты жерлерде мекендейді. Марқакөлде тіршілік етіп жатқан суқұзығындар көлемі жағынан кәдімгі үй қазына жетеқабыл, үлкен. Түсі күлгін-жасыл, қара қауырсынында металл түстес жылтыр байқалады, тұмсығы ұзын болып келеді. Олар шоғырланып жүреді және әртүрлі жерде кездескенімен, негізгі ұя салатын аумақтары – Черепанова омартасы мен Губа учаскесі.
Айта кетейік, Марқакөлде әлемде сирек кездесетін майқан (ускуч) балығы тіршілік етеді. Суқұзғындар дәл осы балық тұқымын қынадай қырып, көбеюіне кесірін тигізіп тұр.
