Премьер-министр Олжас Бектенов ауа райының қолайсыздығына байланысты мектеп оқушылары қай кезде онлайн оқуға жіберілетінін айтты, деп хабарлайды F16.kz.
Үкімет басшысы ауаның ластануы салдарынан оқушыларды қашықтан оқытуға көшіру тек қолайсыз метеорологиялық жағдайлардың (ҚМЖ) II және III дәрежесі кезінде немесе зиянды заттардың концентрациясы нормадан үш еседен жоғары болған жағдайда мүмкін екенін түсіндірді. Мұндай шешімді балалардың денсаулығын қорғау үшін жергілікті атқарушы органдар қабылдайды.
Қашықтан оқыту форматы заңнамада қарастырылған және ол ҚМЖ кезінде, төтенше жағдайларда, шектеу шаралары енгізілгенде, медициналық көрсеткіштер бойынша немесе ата-аналардың өтініші негізінде жүзеге асырылады.
Естеріңізге сала кетсек, қазан айының соңында Өскеменді бірнеше күн бойы қалың түтін басты. Соған қарамастан бастапқы кезде арнайы регламенттің болмауына байланысты оқушылар қашықтан оқытуға көшірілмеді. Кейін II дәрежелі ұзаққа созылған ҚМЖ жарияланғанда әкімдік қашықтан оқыту туралы шешім қабылдады.
