Көлік министрлігі елдегі барлық асфальт-бетон зауытының жұмысын тексеріп, бақылауды күшейтті. Инспекциялық жұмыстарды автомобиль көлігі комитетіне қарасты жол активтерінің ұлттық сапа орталығы жүзеге асырып жатыр, деп хабарлайды F16.kz.
Көлік министрлігінің ақпараты бойынша, бүгінде еліміздегі 431 зауыттың 382-сі, яғни 89% тексеруден өткен. Астана, Шымкент қалалары мен Алматы, Жетісу, Қостанай, Павлодар, Ақтөбе облыстарында жұмыс істеп тұрған барлық АБЗ тексеріспен толық қамтылды.
– Тексеру барысында асфальт-бетон зауыттары және зауыт зертханаларының қолданыстағы нормативтік құжаттардың талаптарына сәйкестігі жан-жақты зерделенді. Әсіресе, сапа қызметіне жауапты мамандардың болуы, жол құрылысы материалдарын сақтау және тасымалдау ережелеріне бағыну мәселелеріне ерекше назар аударылды. Сондай-ақ, сапаны бақылау бойынша технологиялық регламенттердің бар-жоғы тексерілді, – деп хабарлайды дерек көзі.
Инспекция қорытындысы бойынша бірқатар АБЗ-ға қызметін жетілдіру және жаңғырту жөнінде нақты ұсыныстар берілді. Бұл аталмыш зауыттардың қажетті сапа деңгейіне шығуына мүмкіндік береді.
Алдағы уақытта еліміздің өзге өңірлеріндегі зауыттар да дәл осындай тексеріс жұмыстарымен қамтылмақ.
