Шығыс Қазақстан облысында жылумен қамту жүйесі тұрақты жұмыс істеп тұр. Облыс аумағында үш жылу электр орталығы (ЖЭО), 34 орталықтандырылған қазандық жұмыс істеп тұр. Жылыту жүйесіне 513 білім беру нысаны, 314 денсаулық сақтау мекемесі, 12 әлеуметтік қорғау нысаны және 3 085 көпқабатты тұрғын үй қосылған, деп хабарлайды F16.kz.
Температураның сақталуына күнделікті бақылау жүргізіледі. Апаттық жағдайлардың алдын алу және жедел әрекет ету үшін коммуналдық шаруашылықтың барлық бағыттары бойынша 270 маманнан құрылған 80 апаттық бригада жасақталған. Олардың қарамағында 112 арнайы техника бар. Сонымен қатар диспетчерлік қызметтер, коммуналдық кәсіпорындар және жергілікті атқарушы органдар арасындағы өзара іс-қимыл алгоритмдері бекітілген.
Күзгі-қысқы кезеңге 3 087 мың тонна көмір қажет. Қазір халық пен бюджеттік ұйымдар отынмен толық қамтамасыз етілген. Облыстағы жылу көздері мен ЖЭО қоймаларында 253,3 мың тонна көмір қоры бар, бұл 20 тәулікке арналған нормативтік қорға сәйкес келеді. Көмір жеткізу жұмыстары бекітілген жоспарға сай жүргізіледі. — деді ШҚО энергетика және тұрғын үй-коммуналдық шаруашылық басқармасы басшысының орынбасары Рауан Тұрысбек.
Рауан Тұрысбектің айтуынша, көмір бағасы тұрақты бақылауда және 17–27 мың теңге аралығында сақталып жатыр. Энергетика министрлігі, «ҚТЖ» АҚ және көмір өндіруші кәсіпорындармен бірлесіп, отынды уақытылы жеткізу және бағаның өсуіне жол бермеу бойынша жүйелі жұмыстар атқарылып жатыр.
Сондай-ақ 2025–2026 жылғы жылыту маусымына дайындық аясында коммуналдық инфрақұрылымды жөндеу және жаңғыртуға 37,7 млрд теңге бөлінді. Бұл шаралар жылу желілерінің тозу деңгейін 55,6%-дан 50,3%-ға дейін төмендетуге мүмкіндік берді.
