Өзі жұмыс істеген компания кассасынан 10 миллион теңгеден астам қаржы жымқырған бухгалтерге қатысты сот үкімі шықты, деп хабарлайды F16.kz.
Әйел адам Зайсан ауданындағы азық-түлік қоймаларының бірінде бухгалтер-кассир болып жұмыс істеген. Ол 2025 жылдың тамыз айынан қазан айына дейін компания кассасынан жалпы сомасы 10 844 549 теңге жымқырып келгені анықталды.
Сот отырысында шынайы өкінетінін және кәмелетке толмаған балалары болуын алға тартып, қылмыстық жауапкершілік пен жазаны жеңілдетуін сұрады, — делінген облыстық соттың ақпаратында.
Нәтижесінде мүлкін тәркілеумен бірге үш жарым жыл мерзімге бас бостандығын шектеу жазасы тағайындалды. Материалдық шығынды өндіру туралы азаматтық талап қанағаттандырылды.
Үкім әзірге заңды күшіне енген жоқ.
