Шығыс Қазақстан облысында Конституцияның 30 жылдығына орай әртүрлі форматта жүзден астам іс-шара жоспарланып, жүзеге асырылып жатыр, деп хабарлайды F16.kz.
Бұл туралы облыс әкімінің орынбасары Ербол Нұрғалиевтің төрағалығымен өткен Ата заңның 30 жылдығына арналған іс-шараларды ұйымдастыру және өткізу мәселелері пысықталған кеңесте айтылды.
Жиынға облыстық басқармалардың, қала және аудан әкімдіктерінің өкілдері, сондай-ақ қоғам белсенділері қатысты. Қатысушыларға «Ата Заң – Тәуелсіздік тірегі» ұлттық жоспарының жүзеге асырылу барысы туралы ақпарат ұсынылды.
Өңірде әртүрлі форматтағы 128 іс-шараны қамтитын облыстық жоспар бекітіліп, іске асырылып жатыр. Мерейтойлық іс-шараларды ұйымдастыруда негізінен құқықтық-ағартушылық, мәдени және жастар бастамаларына, сондай-ақ әлеуметтік желілердегі белсенді ақпараттық сүйемелдеуге назар аударылған. Бұған дейінгі атқарылған жұмыстарға келсек, 25 мыңнан астам оқушыны қамтыған Ата заңға құрметпен қарауды қалыптастыру және құқықтық мәдениетті дамытуға бағытталған ашық сабақтар, экскурсиялар және құқықтық оқулар өткізілді. Колледждер мен жоғары оқу орындарында пікірсайыстар, пікірталас клубтары, челлендждер мен патриоттық форумдар ұйымдастырылды.
Символдық мәні бар іс-шаралар аясында жас азаматтарға алғашқы жеке куәліктер мен төлқұжаттарды салтанатты түрде тапсыру рәсімдері өтті.
Отбасы қолдау орталықтары мен дағдарыс орталықтарында тегін құқықтық және психологиялық көмек көрсетіліп келеді. Көпбалалы және аз қамтылған отбасыларға қолдау көрсетуге бағытталған әлеуметтік бастамалар жүзеге асырылады.
«Әрекеттегі қоғам» жобасы аясында облыстық қоғамдық кеңес мүшелерінің қатысуымен өңірдің сегіз ауданында халықпен кездесулер мен оқыту семинарлары өткізілді.
Барлық іс-шаралар азаматтардың құқықтық сана-сезімін арттыруға, отбасылық құндылықтарды нығайтуға және жастар арасында патриоттық тәрбиені дамытуға бағытталған.
Кеңес қорытындысы бойынша жоспарланған іс-шараларды жоғары деңгейде ұйымдастыруды қамтамасыз ету жөнінде нақты тапсырмалар берілді.
