Өскемен тұрғындары түсті металлдың түр-түрін «жұтып» жүр. Шығыстың бас шаһарының ауа құрамында қорғасын, мыс, мырыш, кадмий, берилий сияқты ауыр металлдар кездеседі. Бұл туралы BAQ.kz редакциясына жауап берген Экология және табиғи ресурстар министрлігі мәлім етті, деп хабарлайды F16.kz.
Өскемен – ежелден еліміздегі өндірісті қалалардың бірі. Шығыс Қазақстан облысының экономикасы қоршаған ортаға зияны көп энергетика, қара және түсті металлургия, мұнай-газ, кен өндіру сияқты салаларға негізделген. Сол себепті өңірдегі атмосфералық ауа ластануының негізгі көздері – өнеркәсіптік кәсіпорындар, автокөлік және жеке сектор. Ауаға зиянды заттарды шығаратын I, II және III санаттағы кәсіпорындар жұмыс істейді, – деп мәлімдейді министрлік.
Ведомствоның дерегінше, Өскеменде ауаның сапасына тұрақты мониторинг жүргізіледі. Қалада «Қазгидромет» РМК-ға қарасты 10 бақылау бекеті бар, оның бесеуі қолмен, бесеуі автоматты түрде өлшеу жүргізеді.
Барлығы 20 көрсеткіш бақыланады, олардың ішінде PM 2.5 және PM 10 өлшенген бөлшектер, күкірт диоксиді, көміртек оксиді, азот диоксиді мен оксиді, фенол, күкіртсутек, фторлы және хлорлы сутек, формальдегид, бенз(а)пирен, хлор, күкірт қышқылы, озон және ауыр металдар – қорғасын, мырыш, кадмий, мыс, бериллий бар, – деп хабарлады ведомство.
Бұған қоса, автоматтандырылған бақылау станциялары өңірдегі 10 ірі өнеркәсіптік кәсіпорынның аумағына орнатылған. Алайда ресми мәліметтерге сүйенсек, 2025 жылдың алғашқы жартысында жоғары индустриялық белсенділікке қарамастан Өскеменде ауада экстремалды ластану дерегі тіркелмеген.
«Қазгидромет» РМК мәліметіне сәйкес, биылғы бірінші жартыжылдықта қалада ауаның жоғары немесе экстремалды ластану жағдайлары анықталған жоқ, – деп нақтылады министрлік.
Жинақталған экологиялық мәселелерді жүйелі шешу мақсатында министрлік пен облыс әкімдігі 2023–2025 жылдарға арналған «Шығыс Қазақстан облысының экологиялық мәселелерін кешенді шешу жөніндегі жол картасын» әзірлеп, іске асырып жатыр.
Бұл шаралар атмосфералық ауаның ластануын, табиғи және су ресурстарына техногендік қысымды азайтуға, экологиялық ахуалды жақсартуға және халықтың өмір сапасын арттыруға бағытталған.
Айта кетейік, биыл 19 мамырда ТМК аумағында жабдықты жоспардан тыс тазалау кезінде зиянды заттар сыртқа шығарылған. Бұл жағдай адамдардың алаңдаушылығын тудырды. Согра ауданындағы мектептер оқушыларды қашықтан оқытуға көшірді. Алайда ішкі және тәуелсіз тексеру нәтижелері шекті рұқсат етілген мөлшерден асу фактісін анықтаған жоқ.
Дегенмен бұған қарап қалада ауа сапасы жақсы деп кесіп айтуға болмайды. Өскемен әлі де экологиялық жүктемесі жоғары ірі өнеркәсіптік қала болып қала береді. Ластану қаупі азайған жоқ.
