19 қаңтарда православ дінін ұстанушылар Крещение Господне мерекесін атап өтеді. Осыған байланысты Шығыс Қазақстан облысы аумағында суға шомылуға арналған 16 арнайы орын әзірленді, деп хабарлайды F16.kz.
Төтенше жағдайлар департаментінің мәліметінше, рұқсат етілген суға түсу орындары Өскемен, Риддер қалаларында, сондай-ақ Алтай, Глубокое, Катонқарағай, Күршім, Шемонаиха, Ұлан және Үлкен Нарын аудандарында ұйымдастырылады.
ШҚО ТЖД ТЖ жою басқармасының бастығы Эльдар Шаймардановтың айтуынша, мереке күндері қауіпсіздікті қамтамасыз етуге арналған арнайы жоспар әзірленіп, бөлімшелердің дайындығы пысықталған.
Крещение түнінде құтқарушылар, жедел жәрдем және Апаттар медицинасы орталығының дәрігерлерін, полиция мен атқарушы органдардың өкілдерін қоса алғанда 230 адам жеке құрам, 69 техника кезекшілік етеді. Адамдар медициналық және құтқару қызметтері бар, арнайы жабдықталған орындарда ғана шомылғаны дұрыс, – деді басқарма бастығы.
Өскемен және Семей епархиясының кеңсе меңгерушісі Константин Дьяков суға түсу Крещение мерекесінің міндетті шарты емес екенін атап өтті.
Крещение мерекесін рухани шара ретінде қабылдау керек. Мұздай суға шомылу Крещение мерекесін атап өтудегі міндетті шарт емес. Мереке дұғамен, шіркеуге барумен, көркем мінез-құлықпен және игі істер жасау арқылы атап өтіледі. — деді Константин Дьяков.
ТЖД мәліметінше, шомылу орындарында баспалдақ мен қоршау орнатылып, жарық тартылған, жылыту шатырлары да бар. Сүңгуір-құтқарушылар суға түсу кезінде қауіпсіздікті қамтамасыз етеді.
Мамандар қауіпсіздік талаптарын қатаң сақтауға кеңес береді: шомылу алдында міндетті түрде жылыну, таймайтын аяқ киім кию, жылы төсеніш пен сүлгі, ыстық шай алу қажет. Балалар тек ата-аналарымен бірге суға түсе алады. Созылмалы ауруы бар азаматтарға мұздай суға түсу қауіпті. Алкоголь ішімдік ішуге қатаң тыйым салынады.
«Қазгидромет» РМК дерегінше, Крещение түні облыста ауа температурасы −30 градусқа дейін және одан да төмен болуы мүмкін.
