Былтыр Шығыс Қазақстанға 428 мыңға жуық турист келген. Алдағы уақытта бұл көрсеткішті 650 мыңға дейін жеткізу көзделіп отыр. Бұл туралы өңірде туризмді одан әрі дамыту мәселесін талқылаған облыс әкімдігінің отырысында мәлім болды, деп хабарлайды F16.kz.
Облыс әкімі Нұрымбет Сақтағановтың айтуынша, туризмнің тұғырын нықтай түсу үшін барлық болжамды жобалар мен қажетті инфрақұрылым кіретін саланы дамытудың кешенді жоспарын жасау қажет. Атап айтқанда өңір басшысы Риддердегі тау шаңғысы кластеріне қатысты тұжырымдама әзірлеуді тапсырды.
![\"\"](\"https://f16.kz/uploads/posts/2025-04/6aa79fc2-abd9-4020-bf9f-59c01a06c69a.jpg\")
Шығыс Қазақстанның мықты тұсы – экотуризм және этнотуризм. «Altai Fest 2024», «Шығыс салбурыны 2024» іс шаралары, балық аулау және рафтинг бойынша жарыстар өңірдің брендтеріне және туристерді тартудың қуатты құралына айналуда.
Алайда аймақ үшін өзекті болып қалатын мәселе бар — ол заңсыз туристік бизнес. Туризм саласындағы кәсіпкерлердің едәуір бөлігі салықтық және статистикалық есептіліктен қашып, көлеңкеде жұмыс істеуді жалғастырып келеді. Бұл бюджет түсімдерін азайтып қана қоймай, сонымен қатар саланың дамуын стратегиялық жоспарлауды қиындатады, өйткені туристік ағын мен қажеттіліктердің нақты көлемі ескерілмейді. Былтыр мемлекеттік кірістер департаментінің қолдауымен Ұлан, Алтай және Самар аудандарының негізгі тураймақтары бойынша бірқатар тексеру жүргізілді. Жүзден астам жосықсыз кәсіпкер анықталды (әкімшілік жауапкершілікке 52 адам тартылды). Биыл бұл жұмыс күшейтіліп, бүкіл өңірде жүргізіледі.
Жиын барысында өңір басшысы барлық жұмыс істеп тұрған туристік бағыттар мен маршруттарды түгендеуді тапсырды.
Фото: ШҚО әкімінің баспасөз қызметі
