Бүгін өңірде «Адал азамат» біртұтас тәрбие бағдарламасы аясында «Заң және тәртіп» айлығы басталды. Ондағы негізгі мақсат – тұрғындардың, қызметкерлер мен оқушылардың құқықтық мәдениетін арттыру, деп хабарлайды F16.kz.
«Заң және тәртіп» айлығы аясында құқық қорғау органдарының өкілдері мектеп оқушыларымен кездесу өткізіп, оларды қызықтырған сұрақтарға жауап береді. Бүгін осындай танымдық жүздесу Шоқан Уәлиханов атындағы №3 мектеп-лицейінде өтті.
Қоғамның тыныштығы мен сауаттылығы білімді ұрпақтан басталады. Қазір технология, әлеуметтік желілер мен жасанды интеллект күннен-күнге дамып келеді. Осы орайда оқушылардың оны теріс мақсатта пайдаланып, бір-бірін мазақ етуі, балағат сөздер жазуы жиі кездеседі. Мектептегі буллинг мәселесі де өзекті. Елімізде 16 жасқа толмаған жасөспірімдер қылмыстық жауапкершілікке тартылмайды, алайда олар есепке алынуы мүмкін. Ондай жағдайда бала және оның ата-анасымен құқық қорғау органдарының өкілдері жеке жұмыс жүргізеді. Сондықтан мектептен бастап заңды білу мен оны сақтау аса маңызды, – деді аға учаскелік полиция инспекторы, полиция мойоры Мәншүк Раимова.
Сондай-ақ спикерлер Қазақстан заңнамаларына сәйкес ел азаматтары 16 жасқа толғаннан кейін бір ай ішінде жеке куәлік алуы қажет екені еске салды. Аталған мерзім өтіп кеткен жағдайда ол адам әкімшілік жауапкершілікке тартылып, айыппұл арқалауы мүмкін.
Бүгін біздің білім ордамызда маңызды бастама – «Адал азамат» біртұтас тәрбие бағдарламасы аясында «Заң және тәртіп» айлығы басталды. Бұл шара – заңды құрметтеу, тәртіпті сақтау және азаматтық жауапкершілікті қалыптастыру бағытындағы ортақ қадам. Мемлекет басшысы Қасым-Жомарт Тоқаев өз сөзінде заң үстемдігі мен тәртіптің тұрақты әрі әділетті мемлекеттің негізгі тірегі екенін үнемі атап өтеді. Яғни, заң тек талап емес, әр азаматтың саналы таңдауы болуы керек. Мұндай айлықтар мен кездесулер оқушылардың құқықтық мәдениетін нығайтуға оң әсер етеді деп ойлаймын, – деді Шоқан Уәлиханов атындағы №3 мектеп-лицейінің 11-сынып оқушысы Алижан Тоқтаубаев.
Шара соңында оқушылар өз ойларымен бөлісіп, көкейлеріндегі сұрақтарына жауап алды.
