Шығыстың бас шаһарында ұлағатты қазақ педагогикасының көрнекті өкілі, КСРО халық мұғалімі, Қазақ КСР-інің еңбек сіңірген мұғалімі, КСРО халық ағарту ісінің үздігі Құмаш Нұрғалиевтің туғанына 100 жыл толуына орай мерейтойлық форум өтті, деп хабарлайды F16.kz.
Еліміздің білім саласында ойып тұрып орын алатын ұлағатты ұстаздың мұрасын дәріптеп, тағылымды ісін ұлықтаған алқалы жиынды өткізуге Оқу-ағарту министрлігі, Шығыс Қазақстан облысының әкімдігі және облыстық білім басқармасы мұрындық болды. Белгілі педагогтың өмірі мен еңбегін насихаттау мақсатында ұйымдастырылған форумға қоғам және мемлекет қайраткерлері, ардагер ұстаздар, Ресей мен Қазақстанның жоғары оқу орындарының ғалымдары, мектеп және колледж директорлары, жас педагогтер мен студенттер қатысты.
Форумның ресми ашылуында Шығыс Қазақстан облысы әкімінің орынбасары Ербол Нұрғалиев, ҚР Парламенті Мәжілісінің бұрынғы депутаты Светлана Ферхо және Құмаш Нұрғалиевтің отбасы мүшелері құттықтау сөз сөйлеп, ұстаз ұлағатын ерекше ілтипатпен еске алды.
Шара барысында қатысушылар Құмаш Нұрғалиевтің өмір жолына арналған «Аңыз адам» деректі фильмін тамашалап, педагогтың жаңашыл әдістемелік тәжірибесіне арналған көрмені аралады. Көрмеде ұстаздың еңбектері, фотосуреттері мен архивтік материалдар ұсынылып, келушілер өткен ғасырдағы нағыз білім реформаторының тұлғасын тереңірек таныды.
Форумның шарықтау шегі Құмаш Нұрғалиев атындағы жоғары колледжде жаңа мұражайдың ашылу рәсімі болды. Құмаш атамыздың еңбегі мен педагогикалық мұралары сақталатын бұл мұражай болашақ ұрпаққа үлгі болар орталыққа айналмақ.
Өскемендегі мазмұнды шараға онлайн форматта ҚР Парламенті Сенатының депутаты Ольга Булавкина, Ресей Федерациясы Президенті жанындағы Кеңестің жауапты хатшысы, Мәскеу мэрінің кеңесшісі Зинаида Драгункина қатысып, арнайы құттықтау лебіздерін жолдады. Олар Құмаш Нұрғалиевтің жаңашылдыққа толы әдістемелік идеялары мен жас ұрпақ тәрбиесіндегі үлесін жоғары бағалады.
Сондай-ақ форум барысында қатысушылар ұстаз туралы жылы естеліктермен бөлісті. Олардың қатарында «Өрлеу» біліктілікті арттыру ұлттық орталығы» АҚ ШҚО филиалының директоры Гаухар Жұманова, Боран орта мектебінің түлегі Рахима Смаилова және ҚР білім беру ісінің үздігі Әлібек Нұрмұхамбетов бар. Әрқайсы Құмаш Нұрғалиевтің адамгершілігі мен білімге деген адалдығын ерекше атап өтті.
Жиын соңында еліміздің білім беру саласын дамытуға сүбелі үлес қосқан педагогтер мен қоғам қайраткерлеріне Құрмет грамоталары мен алғыс хаттар табыс етілді. Марапатталғандар қатарында қоғам қайраткері Светлана Ферхо, ұстаздың қызы, педагог Гүл Нұрғалиева, Құмаш Нұрғалиев атындағы гимназия (Марқакөл ауданы), №43 мектеп-лицейі (Өскемен қаласы), Құмаш Нұрғалиев атындағы жоғары колледж бар.
Жалпы форумға Қазақстанның түкпір-түкпірінен келген 500-ге жуық педагог қатысты.
Өскеменде өткен бұл форум – бір адамның өмір жолын ғана емес, тұтас бір дәуірдің педагогикалық мәдениетін дәріптеген тағылымды жиын болды. Ұстаздың 100 жылдығы оның ұлағатын жаңғыртып қана қоймай, жас мұғалімдерді ізденіске, шығармашылыққа және рухани биіктікке жетеледі.
