Былтыр Шығыс Қазақстан облысында жаңадан 2556 адам онкологиялық дертке шалдыққаны анықталды. Жалпы, өңірде қатерлі аурумен ауыратын 15 134 науқас диспансерлік есепте тұр. Бұл туралы облыста онкологиялық аурулармен күрес жөніндегі кешенді жоспардың орындалу барысы талқыланған жиында айтылды, деп хабарлайды F16.kz.
Ресми дерекке сүйенсек, 2025 жылы өңірде 140 мыңнан астам тұрғын скрининг тексеруден өтті. Бұл қатерлі ісіктің асқынған түрлерін азайтуға және ем-домды жақсартуға мүмкіндік берді. Ерте анықтауда емханалардағы скрининг және қарау кабинеттерінің рөлі ерекше екені атап өтілді.
Сонымен қатар отырыста онкологиялық қызметтің кадрлық мәселелері көтерілді. Кейбір аудандарда, соның ішінде Самар мен Күршімде, онколог-дәрігерлер тапшылығы бар. Осыған байланысты жас мамандарды қолдау және оларды өңірлерге тарту шараларын күшейту қажеттігі айтылды.
Жиында 2026 жылға арналған скрининг зерттеулерді ұйымдастыру, Скрининг орталығының қызметі және пациенттерге арналған әлеуметтік-медициналық оңалту кабинетін ашу мәселелері де қаралды.
Жиын қорытындысы бойынша 2026 жылға арналған онкологиялық қызметті дамыту бағыттарын айқындайтын резолюция қабылданды. Сондай-ақ онкологиялық көмек көрсетуде жоғары нәтижеге қол жеткізген бірқатар медициналық ұйым марапатталды.
