Күршім ауданында «Бірқабатты Шығыс» бағдарламасы аясында биыл 14 үй салынады. Бұл туралы аудан әкімі Мейіржан Әлбеков өңірлік коммуникациялар қызметінде өткен баспасөз мәслихатында мәлім етті, деп хабарлайды F16.kz.
Бүгінде Күршімнің егістік алқабының 96,5 пайызы немесе 22,4 мың гектары жиналды. Жыл басынан бері мемлекеттік қолдау бағдарламалары арқылы 58 кәсіпкерге 448,6 млн теңге көлемінде қаражат бөлінді. 31 шаруа қожалығы лизингке 37 ауыл шаруашылығы техникасын сатып алды. Биыл аудан бойынша 787 жұмыс орнын құру жоспарланып, іс жүзінде 746 жұмыс орны ашылды немесе жылдық жоспар 95%-ға орындалды, — деді жыл басынан бері ауданда атқарылған жұмыстарды тізіп өткен Мейіржан Әлбеков.
Оның айтуынша, бүгінде Күршім ауылын айналып өтетін көлік жолының құрылысы жүріп жатыр. Жоба келер жылы аяқталады.
Ауданда «Бірқабатты Шығыс» бағдарламасы аясында биыл 14 тұрғын үй бой көтереді. Оның 13-і Күршім ауылында салынса, бір үй Алғабаста ірге тебеді.
