Тарбағатайлық тұрғындар тұрғылықты жері бойынша сайлау учаскелеріне барып, азаматтық таңдауларын жасауда. Сондай-ақ ауданда түрлі әлеуметтік және мәдени шаралармен да ұйымдастырылған.
Атап айтқанда Ақжар ауылында «Мектепке жол» акциясы өтіп жатыр. Акция аясында балаларға қажетті оқу-құралдар мен мектеп формаларының жәрмеңкесі ұйымдастырылып, ата-аналар жаңа оқу жылына қажетті заттарды тиімді бағамен сатып алуға мүмкіндік алды.
Балалардың жазғы демалысын көңілді өткізуіне арналған арнайы бағдарлама жоспарланған. Кішкентай тұрғындар үшін концерттік бағдарлама ұсынылып, көбік кеші мен түрлі түсті краска-шоу өткізілді. Балалар ән айтып, би билеп, ойын-сауыққа қатысып, көтеріңкі көңіл-күйге бөленді.
Сонымен қатар ауданның ауылдық округтерінде ауыл шаруашылығы жәрмеңкелері өтіп, тұрғындарға азық-түлік, көкөніс және ет өнімдері ұсынылуда. Мұндай шаралар халықтың қажетті тауарларды қолжетімді бағамен алуына мүмкіндік берсе, екінші жағынан жергілікті шаруалардың өнімін өткізуіне жол ашып отыр.
Ауданда барлығы 31 ашық сайлау учаскесі жұмыс істеп, онда 93 «ДАУЫС» қоғамдық байқаушылар коалициясының өкілі және 105 партия бақылаушысы бақылау жүргізуде.
Сайлау учаскелерінде дауыс беру белгіленген тәртіппен өтіп жатыр. Алғашқылардың бірі болып дауыс берген азаматтарға, алғаш рет сайлауға қатысқан жастарға және сайлауға келген қарттарға сыйлықтар табысталды.
Айта кетейік, Құрылтай депутаттарының сайлауында дауыс беру жергілікті уақыт бойынша сағат 07:00-ден 20:00-ге дейін жүргізіледі.
