Қапшағай су қоймасы жағалауында бойжеткен суға батып кетті. Қайғылы жағдай кезінде жағажайда құтқару қызметі де, дәрігерлер де болмаған, деп хабарлайды F16.kz порталы Sn.kz телеграм арнасына сілтеме жасап.
Дәл осы күні көппен бірге жағажайда демалып жатқан Парламент Мәжілісінің депутаты Бақытжан Базарбек оқыс оқиға кезінде адамдар құтқару қызметінің өкілдерін де, дәрігерлерді де таппай қалғанын айтты.
Бұл жағажайда медициналық қызмет болуы керек. Ешкім жауап бермейді. Міне көз алдымызда қыз бала суға батып кетті. Қауіпсіздік жүйесі қайда? Мен көріп тұрмын ғой, құтқарушылар 10 минуттан кейін жетті. Полициядан да, дәрігерлерден де пайда жоқ, – деді Бақытжан Базарбек.
Куәгерлердің айтуынша, суға батқан бойжеткенді жағаға сол жерде шомылып жүрген демалушылар алып шығып, алғашқы көмек көрсеткен. Бірақ бәрі кеш болды, оның өмірін сақтап қала алмады. Ал оқиға орнына келген полиция қызметі «судағы қауіпсіздікке уәкілетті органдар жауапты» деуден аспады.
Айта кетейік, су қоймасының жағалауындағы демалыс орындары жеке кәсіпкерлерге тиесілі, олар тек ақша жинаумен шектеліп, қауіпсіздікке бас қатырмаған. Мұндай салғырттықтың соңы қайғылы аяқталды.
Мәжіліс депутаты жағажай иелерін анықтап, заң бұзылған жағдайда жауапқа тарту үшін тексеру жүргізуді талап етті.
