«Қазгидромет» мамандары алдағы қыс қатты болады деп болжап отыр. Әсіресе, еліміздің шығысында қар қалың жауып, желтоқсан, қаңтар айларында аяз әдеттегі нормадан төмендейді. Оқтын-оқтын боран соғуы да мүмкін. Табиғаттың тосын мінезіне шығысқазақстандық жолшылар қазірден дайындалып жатыр, деп хабарлайды F16.kz.
Бүгінде өңірдегі автокөлік жолдарын қысқы мерзімге дайындау үшін 957 техника қамдалып, аудан-қалаларға климаттық ерекшеліктеріне қарай тең бөлінген.
Республикалық маңызы бар жолдарда «ҚАЖсервис» ЖШС облыстық филиалы қызмет көрсетеді. Оның иелігінде 103 техника бар, 95%-ы жұмыс істеп тұр. Ал облыстық маңыздағы жолдарда «ОблШығысЖол» ЖШС қызмет көрсетеді. Оның иелігінде 119 техника бар, 93%-ы жұмыс істеп тұр. Аудандық жолдарда және елді мекен көшелерінде жұмыс істеуге 735 техника қарастырылған.
Бүгінге дейін 140 мың литр жанармай, көктайғақта жолға төгетін материалдар, 50 тонна техникалық тұз және 800 тонна көмір дайындалды. Барлығы 2500-ден астам сигналдық таяқ орнатылып, 1666 жасанды құрылыс пен 96 көпір тазаланды. Қар қалың жауатын жол учаскелерінде (Өскемен – Тарғын – Самар, Теректі – Ұранхай – Төсқайың, Күршім – Қалжыр) қар ұстап қалатын қалқан панельдер орнатылып, көшкінге қарсы шаралар қолға алынды.
Төтенше жағдайларға жедел әрекет ету үшін 7865 құтқарушы, 913 техника, оның ішінде қар тазалау, инженерлік және эвакуациялық техника бөлінген. Жеті жылу пункті және Привольное ауылында бір трассалық медицина-құтқару пункті жұмыс істейді.
«Қазгидромет» филиалымен бірлесіп дауылды ескертулер бойынша тұрақты байланыс ұйымдастырылған. Халықты жедел хабардар ету SMS-хабарлама, «Darmen» мобильді қосымшасы, телеарна, радио және облыстағы 48 дабыл құрылғысы арқылы жүзеге асырылады. Сонымен қатар өңірде қысқы балық аулауға арналған 40-тан астам арнайы орын дайындалған. Тұрғындардың қауіпсіздігін қамтамасыз ету және төтенше жағдайлардың алдын алу мақсатында қыркүйектен бастап 110 алдын алу рейді өткізіліп, 1100 ескертпе таратылды, 38 нұсқаулық өткізілді.
Қызметтердің қысқа дайындығы командалық-штабтық «ҚЫС-2025» жаттығулары барысында тексеріледі, – деп хабарлады ШҚО ТЖД баспасөз қызметі.
