Шығыс Қазақстанға арнайы ат басын бұратын туристер саны жылдан-жылға артып келеді. Әсіресе, жазғы маусымда қонақ үй жетіспеушілігі байқалады. Сондықтан Өскеменде көз ұзамай екі ірі қонақ үй құрылысы басталады, деп хабарлайды F16.kz.
Облыстық туризм басқармасының басшысы Ержан Сембиновтің айтуынша, шетелдік инвесторлар облыс орталығында қонақ үй салуды жоспарлап отыр.
Туристік маусымның шарықтау кезеңінде және ірі іс-шаралар өткізілгенде қонақ үй жетіспей қалады. Осыған байланысты біздің басқарма Қытайдан инвестор тартты. Ол 15 миллиард теңге көлемінде бес жұлдызды қонақүй салуды жоспарлап отыр. Жобаның ауқымы — 150 нөмір, — деді басқарма басшысы.
Қазір туризм басқармасы Өскемен әкімдігімен бірлесіп, қонақ үй салынатын жер телімін анықтап жатыр.
Сондай-ақ тағы бір жергілікті инвестор Hilton Garden Inn қонақ үйін (орта деңгейлі америкалық қонақүй желісі — ред.) салуды жоспарлап отыр. Жобаның құны 17 миллиард теңгеге бағаланған
Бұл жоба қаңтар айында сараптамаға енгізіледі. Құрылыс жұмыстары 2026 жылдың бірінші жартыжылдығында басталуға тиіс, — деді Ержан Сембинов.
