Шығыс Қазақстандағы Самар жағалауына Қытайдың туроператорлары жұмыс сапарымен келді. Сапар барысында олар өңірдің туристік әлеуетімен танысып, жергілікті билік өкілдерімен әріптестік бағыттар мен алдағы бірлескен жобаларды талқылады, деп хабарлайды F16.kz.
Қытайлық мамандардың айтуынша, Самар ауданының географиялық орналасуы тиімді әрі туризмді дамытуға мүмкіндігі жоғары.
Қонақтар демалыс орындары жоспарланған аумақтарды аралап, туристік үйлер мен инфрақұрылыммен танысты. Әсіресе табиғаты көркем жағалау мен қолайлы климат болашақ туристік бағыттар үшін тартымды екені атап өтілді.
Біз жағалаудағы инфрақұрылымды кезең-кезеңімен дамытып, туристерді жайлы әрі қауіпсіз қабылдауға барлық жағдайды жасап жатырмыз. Бүгінде бұл өңір Ресей азаматтары арасында сұранысқа ие, енді Қытайдан келетін қонақтарды да қарсы алуға дайынбыз, – деді Самар ауданының әкімі Серік Жеңісов.
Жақында жағалауда инфрақұрылымды жақсарту жұмысы жүргізіледі. Атап айтқанда, ұялы байланыс пен интернет желісі іске қосылып, Самар – Миролюбовка бағытындағы автожолды жөндеу жалғаспақ.
Қытай делегациясы өкілдері сапар соңында өңірдің туристік әлеуетін жоғары бағалап, ынтымақтастықты дамытуға қызығушылық танытты. Қол жеткізілген келісімдерге сәйкес, алдағы туристік маусымнан бастап Қытай азаматтарына Самар ауданына арнайы тур ұйымдастыру жоспарланды.
Айта кетейік, бұған дейін Шығыс Қазақстан облысы әкімінің орынбасары Бақытжан Байахметов бастаған делегация Қытай Халық Республикасының Шыңжаң-Ұйғыр автономиялық ауданындағы Үрімші қаласына барып, бірқатар ынтымақтастық туралы меморандумға, оның ішінде туризм саласы бойынша келісімдерге қол қойған болатын.
