Шығыс Қазақстан облысының Кәсіпкерлер палатасында жаңа Салық кодексіне енгізілген өзгерістерді түсіндіру жалғасып келеді. Кәсіпкерлерге қолдау көрсету мақсатында «Бизнес және салықтар» ақпараттық-түсіндіру жобасы іске асырылған, деп хабарлайды F16.kz.
ШҚО бойынша мемлекеттік кірістер департаментінің өкілі Гүлмира Сабралимова салықтық әкімшілендірудегі жаңашылдықтарға тоқталды. Оның айтуынша, бірқатар есептілік нысандары алынып тасталып, рәсімдер айтарлықтай жеңілдетілген.
Енді есептілік уақытында тапсырылмаған жағдайда жүйе кәсіпкердің жеке кабинеті арқылы нөлдік декларацияны автоматты түрде қалыптастырады. Бұл ретте айыппұл салынбайды, шоттар бұғатталмайды және хабарлама жолданбайды. Алайда автоматты есептіліктің дұрыс қалыптасуы үшін кәсіпкер өз салық режиміне сәйкес есеп нысандарын алдын ала дұрыс таңдауы қажет.
Сонымен қатар жаңа тәртіпке сәйкес есептілікті кері қайтарып алу немесе тапсыру мерзімін ұзарту мүмкіндіктері жойылған. Сондықтан барлық салық есептілігін уақтылы және дұрыс тапсыру маңызды.
Кездесу барысында қызметі тоқтатылған кәсіпкерлерге де ерекше назар аударылды. Қызметі тоқтатылғанына қарамастан, кәсіпкерлер 1 наурызға дейін арнайы салық режиміне көшу туралы өтініш беруге міндетті. Әйтпесе, олар автоматты түрде жалпыға бірдей салық режиміне ауыстырылады. Арнайы режимге өткен соң кәсіпкер қызметін қайта тоқтата алады, егер тоқтату мерзімі уақтылы ұзартылса.
Кәсіпкерлер палатасы директорының орынбасары Айжан Жәңгірханова «Халықтық бухгалтер» акциясының маңызын атап өтті. Акция аясында кәсіпкерлер салық мамандарынан тікелей кеңес алып, қателіктердің алдын ала алады.
Айта кетейік, «Халықтық бухгалтер» акциясы 30 маусымға дейін жалғасады. Өскемен қаласында аптасына үш рет кеңес алуға болады, ал өңірдің аудан-қалаларындағы кәсіпкерлер 8-771-123-80-84 нөміріне бейнеқоңырау шалуға мүмкіндік бар.
«Бизнес және салықтар» жобасы аясындағы кездесулер алдағы уақытта да жалғасады.
