Шығыстың бас шаһарында қызметтік міндетін атқару кезінде қаза тапқан 29 полицейдің құрметіне арналған мурал ашылды, деп хабарлайды F16.kz.
ШҚО полиция департаментінің бастамасымен және қала әкімдігінің қолдауымен қолға алынған арт туынды Өскемендегі көпқабатты тұрғын үйлердің бірінің қабырғасына салынды. Композицияның орталық бейнесі – «Ер есімі – ел есінде» деген жазуы бар полиция қызметкерінің сұлбасы. Бұл – қызметке деген адалдықтың, табандылықтың символы.
Біздің қызметкерлер үшін бұл арт-нысан – жай ғана символ емес, бұл – міндет. Біз азаматтардың сенімін нығайтып, тәртіп пен қауіпсіздікті қамтамасыз етуіміз керек. Мемлекет басшысы атап өткендей, заңды мүлтіксіз сақтамайынша, заманауи әрі өркендеген қоғам құру мүмкін емес. Біздің міндет – әрбір өңір тұрғыны мен басқа да адамдар өзін қауіпсіз сезінетін орта қалыптастыру, – деді ШҚО ПД бастығы Ерлан Омарбеков.
Муралдың ашылуында құқық қорғау органдары қызметкерлерімен бірге қаза тапқан полицейлердің туыстары да болды. Олар полиция департаменті өздерін ұмытпай, әр отбасымен байланысын жылдар бойы үзбей келе жатқанына ризашылық білдірді.
