«Майқапшағай» кеден бекетінде шетел валютасын заңсыз жолмен шекарадан алып шығу фактісі анықталды, деп хабарлайды F16.kz.
Шығыс Қазақстан облысы бойынша мемлекеттік кірістер департаменті баспасөз қызметінің хабарлауынша, кедендік бақылау кезінде ҚХР азаматы 20 мың АҚШ долларына баламалы шетел валютасын, нақтырақ айтқанда 20 мың АҚШ доллары, 8 мың еуро және 9 250 рубльді кедендік декларациясыз алып өтпек болған.
Қазақстан заңнамасына сәйкес, жеке тұлға шетелге жалпы сомасы 10 мың АҚШ долларына дейінгі қолма-қол ақшаны декларациясыз алып өте алады. Ал белгіленген шектен артық қаржы міндетті түрде кедендік декларациялауға жатады. Алайда бұл азамат аталған лимиттен айтарлықтай асып кеткен.
Осы оқиғаға байланысты ҚР Әкімшілік құқық бұзушылықтар туралы кодексінің 551-бабы 3-бөлігіне сәйкес, заң талаптарын бұзған тұлғаға жалпы соманың 25 пайызы көлемінде айыппұл салынып, артық қаражат мемлекет пайдасына тәркіленеді. Нәтижесінде ҚХР азаматына 2 466 274 теңге көлемінде айыппұл салынды. Сонымен қатар, 19 174 АҚШ доллары мемлекет меншігіне тәркіленді.
Президенттің 2022 жылғы 14 наурыздағы №830 Жарлығына сәйкес, ел аумағынан 10 мың АҚШ долларынан асатын қолма-қол шетел валютасын, сондай-ақ аффинирленген алтын құймаларын (5 грамнан бастап) шығаруға шектеу қойылады.
