«Омбы – Майқапшағай» тасжолының ШҚО аумағымен өтетін бөлігіндегі жол-құрылыс жұмыстары жыл соңына дейін аяқталады. Бұл туралы ШҚО-ға жұмыс сапарымен келген Көлік вице-министрі Талғат Ластаев айтты, деп хабарлайды F16.kz.
– Өңірде ұзындығы 231 шақырым болатын Калбатау – Майқапшағай жобасын іске асыру жалғасуда. Қазіргі уақытта барлық асфальт-бетон төсеу жұмыстары аяқталып, негізгі жол бойымен еркін жүріп-тұру қамтамасыз етілген. Нысанда 180 жұмысшы мен 100 техника бірлігі жұмыс істеуде. Жыл соңына дейін қалған жұмысты аяқтауды көздеп отырмыз, – дейді вице-министр.
Атай кетейік, қазіргі уақытта облыс аумағындағы республикалық маңызы бар автомобиль жолдарының жалпы ұзындығы 1 194 шақырымға жетеді және оның 92%-ы нормативтік талаптарға сай келеді.
Белгілі болғандай, ағымдағы жылы орташа жөндеу жұмыстары жалпы ұзындығы 356 шақырым болатын 12 учаскеде жүргізілді. Олардың қатарында төмендегі жолдар бар:
- Өскемен – Алтай – Үлкен Нарын – Катонқарағай – Рахман қайнары (ұзындығы 164 шақырым);
- Өскемен – Риддер – Ресей Федерациясының шекарасы (75 шақырым);
- Алматы – Өскемен – Шемонаиха – Ресей Федерациясының шекарасы (93 шақырым);
- Омбы – Майқапшағай – Қалжыр – Марқакөл (24 шақырым).
Аталған жобалардың барлығын ағымдағы жылдың соңына дейін аяқтау жоспарланып отыр.
Сондай-ақ, өңірде Өскемен – Рахман қайнары трассасының бойындағы айналма жолдың құрылыс жұмыстары жүргізілуде. Бұл жоба аясында Тереңсай асуындағы көпірдің құрылысы жалғасып жатыр. Жоба шеңберінде жолдың 22 шақырымына асфальттың негіз қабаты, 20 шақырымына төменгі қабаты және 12 шақырымына үстіңгі қабаты төселді. Құрылыс жұмыстарына 229 маман мен 107 бірлік техника жұмылдырылған.
Сондай-ақ облыста жергілікті маңызы бар автомобиль жолдарында 1 дана автоматты салмақ-габариттік бақылау жүйесі («Талдықорған – Калбатау – Өскемен» автожолы, 1046-1073 шақырым) орнатылғанын айту керек. Ағымдағы жылы жергілікті маңызы бар жолдардың біріне осындай жүйенің тағы біреуін орнату жоспарланып отыр.
