Марқакөл ауданындағы «Бекзат 2024» ауылшаруашылық өнеркәсібі «Ауыл аманаты» бағдарламасының қолдауымен жем-шөп өндіретін жаңа цехқа қажетті жабдықтар сатып алды. Ауылдағы шағын кәсіпорын Тәуелсіздік мерекесі қарсаңында іске қосылды, деп хабарлайды F16.kz.
Бұл – Президент Қасым-Жомарт Кемелұлы Тоқаевтың ауылды көркейту мен кәсіпкерлікті дамытуға бағытталған тапсырмаларының нақты жүзеге асып жатқанын көрсетеді.
Марқакөл ауданының әкімі Рүстембек Кемешов жаңа өндіріс нысанының ашылуына қатысып, оның аймақ үшін маңызын атап өтті. Оның айтуынша, ауыл шаруашылығын өркендету – ауданның басты бағытының бірі, ал жаңа цехтың жұмысы мал өсіретін шаруаларға қолдау көрсетіп, жергілікті экономиканың дамуына ықпал етеді. Әкім мұндай жобалар ауыл кәсіпкерлеріне нақты мүмкіндік ашатынын жеткізді.
Өндіріс орнын ашқан кәсіпкер – Данияр Оразиманов. Ол «Ауыл аманаты» бағдарламасы арқылы төмен пайызды несие алып, осы жобаны жүзеге асырғанын айтты. Даниярдың сөзінше, алынған қаржының арқасында цех толығымен жабдықталып, енді аудан шаруаларын сапалы жем-шөппен қамту көзделіп отыр.
«Ауыл аманаты» бағдарламасы біз секілді ауыл кәсіпкерлеріне зор мүмкіндік беріп отыр. Алған несиемнің арқасында осы цехты ашып, қажетті жабдықтарды толық орнаттым. Енді аудан шаруаларын сапалы жем-шөппен қамтамасыз етіп, жұмысты кеңейтуді көздеп отырмын», – деді кәсіпкер.
Жаңа цехтың іске қосылуы мал шаруашылығының дамуына оң әсер етіп, өңірдегі шаруашылықтардың жем-шөппен тұрақты қамтамасыз етілуіне мүмкіндік береді.
