Марқакөл ауданында туризмді дамыту бағытында жаңа инвестициялық жобалар жүзеге асып жатыр. Биыл «Ауыл аманаты» бағдарламасы аясында жалпы құны 61 млн теңге болатын екі жоба мақұлданды, деп хабарлайды F16.kz сайты.
Бұл туралы аудан әкімі Рүстембек Кемешев Өңірлік коммуникациялар алаңында өткен брифинг барысында айтты.
Аудан әкімдігінің мәліметінше, Ұрынқай ауылында «Марқакөл Экоплаза» ауыл шаруашылығы өндірістік кооперативі 30 млн теңгеге қонақ үй салуды жоспарлап отыр. Ал «Хадия» кооперативі 31 млн теңге инвестиция тартып, жаңа демалыс базасын іске қоспақ.
Соңғы жылдары Марқакөл өңірінде экологиялық туризмге сұраныс артып келеді. Осыған байланысты жеке инвесторлар да туристік инфрақұрылымды дамытуға белсенді кірісе бастаған. Былтыр жеке инвестиция есебінен «Markakol Lodge» жобасы аясында Ұрынқай ауылында алты глэмпинг үйі пайдалануға берілді.
Туристік әлеуеті жоғары Ұрынқай ауылы бұған дейін «Шығыс Қазақстан облысының үздік рекреациялық туристік аймағы» байқауында жеңімпаз атанып, инфрақұрылымды дамытуға 200 млн теңге иеленген болатын. Оның 100 млн теңгесі өткен жылы игерілсе, қалған қаражатты биыл туристік нысандарды дамытуға бағыттау жоспарланып отыр.
Бұдан бөлек, ауданда мәдени туризмді дамытуға да басымдық берілуде. Биыл Ұрынқай ауылында «Марқакөл – Шығыстың маржаны» мәдени-көпшілік фестивалі, ал Қалжыр ауылында «МарқаFest» фестивалі ұйымдастырылады. Бұл шаралар өңірдің табиғи ерекшеліктерін насихаттап, ішкі туризмді дамытуға және Марқакөлге келетін қонақтар санын арттыруға ықпал етеді.
Жергілікті билік туризм саласына тартылып жатқан инвестициялар жаңа жұмыс орындарын ашып қана қоймай, аудан экономикасының дамуына да серпін береді деп отыр.
