Шығыс Қазақстан облысында қарғын суға қарсы дайындық қарқынды жүріп жатыр. Наурыз айының соңына қарай өңірде көктемгі су тасқынының бірінші кезеңі басталады, деп хабарлайды F16.kz.
Көп жылғы бақылауларға сәйкес, бұл кезеңде өзен-суларда сең жүреді. Әдетте ол наурыз айының соңынан сәуірдің соңына дейін жалғасады. Осы уақытта Қара Ертіс, Үлбі, Бұқтырма, Күршім, Абылайкит және Ақсу өзендерінде мұз кептелісі пайда болады.
Облыста 1 ақпаннан бастап жоғары дайындық режимі енгізілген. Төтенше жағдайлар департаментінде тәулік бойы жұмыс істейтін жедел штаб құрылған. Сонымен қатар су басу қаупі бар әрбір елді мекенге жауапты мамандар бекітілген. Арнайы іс-шаралар жоспары әзірленіп, былтыр өңірде 28 инженерлік жұмыс атқарылған. Төтенше жағдайлар департаменті бастығының орынбасары Амангелді Енсегеновтің айтуынша, биыл 9-15 ақпан аралығында арнайы жұмыс топтары жергілікті атқарушы органдардың дайындық деңгейін тексеріп, тиісті ұсыныстар берілген.
Қазір облыста каналдар, арықтар, су өткізу жүйелері мен көпірлерді тазарту жүргізіліп жатыр. Бүгінде жоспарланған жұмыстың 84,4 пайызы орындалған. Атап айтқанда, каналдардың 81,8 пайызы, арықтардың 74,3 пайызы, су өткізу нысандарының 86,1 пайызы және көпірлердің 90 пайызы тазартылды. Сонымен қатар елді мекендерден 335 мың текше метр қар шығарылған.
Материалдық қор дайындалған: 82 мың қап, 10,2 мың тонна инертті материал және 393 тонна жанармай қоры жасақталды.
Мұз кептелісінің алдын алу үшін жеті ауданда қауіпті 20 учаске анықталды. Қазір аталған учаскелерде қажетті жұмыс жүргізіліп жатыр.
Төтенше жағдай туындай қалса жедел әрекет ететін 3677 адамнан тұратын жасақ пен құралдар дайын. Оның ішінде 556 техника, 75 жүзу құралы және 234 мотопомпа бар.
Қосымша бақылау жүргізу үшін Алтай ауданына әскери бөлімнің қызметкерлері жіберілген. Ал қажет болған жағдайда тұрғындарды көшіру үшін 13 мың адамға арналған 137 эвакуациялық пункт дайын тұр.
Халықты ақпараттандыру жұмысына да басымдық берілген. Бүгінге дейін 411 рейд ұйымдастырылып, 12 мыңнан астам жадынама таратылған. Қауіп күшейген жағдайда тұрғындарға 48 сирена, SMS хабарламалар, теле-радио құралдары және «Дармен» қосымшасы арқылы ескерту жасалады. Сондай-ақ «Масс Алерт» жүйесі де іске қосылады.
Құтқарушылар өңір тұрғындарын сақтық шараларын естен шығармауға және ресми ақпаратқа жүгінуге шақырады.
