«Ауыл аманаты» бағдарламасы арқылы қолдау қаражат алған 2 мыңға жуық адам 13 млрд теңгені ауыл шаруашылығын дамытуға қатысы жоқ мақсатқа жұмсаған, деп хабарлайды F16.kz.
Бұл туралы Үкімет отырысында қаржы министрі Мәди Такиев мәлім етті. Оның айтуынша, мемлекет қаражаты сұлулық салонын, дүкен, сауна мен мейрамханалар ашуға жұмсалған.
Мемлекеттің ақшасын депозитке салған
Көлеңкелі экономикамен күрес тақырыбын қаузаған министр бюджет қаражатын мақсатсыз жұмсау жағдайлары әлеуметтік-кәсіпкерлік корпорациялардың (ӘКК) қызметінде де анықталғанын тілге тиек етті.
Өңірлік әлеуметтік-кәсіпкерлік корпорациялар мемлекеттік қолдауды баю құралына айналдырып отыр, олар алған несиелерін пайыз түрінде кіріс алу үшін банктерге депозит етіп салады. Мұндай деректер Түркістан облысында 2 млрд теңгеге, Абай облысында 152 млн теңгеге анықталды, – деп атап өтті ведомство басшысы.
Салықтан жалтару: 60,4 млрд теңге берешек
Мемлекеттік қолдауды мақсатсыз жұмсаудан бөлек министрлік өзге де схемалармен күресіп жатыр. Шағын және орта бизнес секторында салықтарды барынша азайту және төлеуден жалтару әрекеттері көп. Мәселен, бір заңды мекенжайға бірнеше компанияны тіркеу белең алған. Деректерге сәйкес, тек 3,5 мың мекенжайда 20 мыңға жуық компания тіркелген, олардың салықтар бойынша берешегі 60,4 млрд теңгеге жеткен.
