Денсаулық сақтау министрлігі жаңа оқу жылынан бастап еліміздің мектепке дейінгі және мектеп ұйымдарында тамақтанудың жаңа стандартын енгізуге дайындалуда, деп хабарлайды F16.kz.
– Стандарттарға сәйкес, тамақтануды ұйымдастыру процесіне қатысушылардың барлығының нақты функциялары анықталды. Санитариялық-эпидемиологиялық бақылау комитеті үлгілік мәзірдің 3 нұсқасын әзірлеп, оларды өңірлік денсаулық сақтау басқармаларына жіберді. Ал жергілікті жерлерде ата-аналардан, балалардан және педагогикалық қоғамдастықтан негізделген тілектер болған жағдайда ұсынылған түрдегі немесе өзгерістер енгізе отырып перспективалық мәзір бекітілуі мүмкін, – дейді Денсаулық сақтау бірінші вице-министрі Тимур Сұлтанғазиев.
Белгілі болғандай, жаңа стандарт семіздік, қант диабеті, жүрек-қан тамырлары және басқа да созылмалы аурулардың даму қаупін азайту мақсатында қант пен тұзды тұтынуды азайтуды қоса алғанда, оқушылардың диетасын жақсартуға бағытталған.
Мамандардың пікірінше, стандарт талаптарын қатаң сақтау балалардың семіздігін 10-15%- ға, 2 типті қант диабетін 10-20%-ға, артериялық гипертензияны 8-18%-ға және басқа созылмалы ауруларды 5-15%-ға төмендетуге ықпал етеді.
Бұл ретте балалардың жаңартылған рационына көкөніс, жеміс, тұтас дәнді дақылдар, ақуыздар мен сүт өнімдерін көбірек қосу көзделген.
