Қазақстан Президенті Қасым-Жомарт Тоқаев Түркия Республикасының вице-президенті Джевдет Йылмазмен кездесті, деп хабарлайды F16.kz порталы Ақордаға сілтеме жасап.
Ақордада өткен келіссөздер барысында Мемлекет басшысы елімізге алғаш рет сапармен келген түрік делегациясына ілтипат білдіріп, Түркияның Қазақстан үшін стратегиялық маңызы бар серіктес екенін атап өтті.
Президенттің айтуынша, екі ел арасындағы бауырластық байланыс өзара сенім мен құрметке негізделген. Соңғы 35 жылға жуық уақыт ішінде мемлекеттер түрлі салада жоғары нәтижеге қол жеткізіп, ынтымақтастықты жаңа деңгейге көтерген.
Қарым-қатынасымыз жоғары қарқынмен дамып келеді. Арамызда ешқандай түйткіл жоқ. 14 мамырда Режеп Тайип Ердоған Қазақстанға мемлекеттік сапармен келеді. Оның аясында Стратегиялық ынтымақтастық кеңесінің кезекті отырысы өтіп, бірқатар маңызды келісімдерге қол қойылады, – деді Қасым-Жомарт Тоқаев.
Кездесу барысында Мемлекет басшысы Астанада өткен Қазақстан-Түркия үкіметаралық комиссиясының отырысына да тоқталды. Қасым-Жомарт Тоқаевтың пікірінше, қос тараптың тең төрағалығымен өткен жиын қорытындысы екіжақты әріптестікті одан әрі жандандыруға ықпал етеді.
Тараптар саяси диалогты нығайту, сауда-экономикалық және инвестициялық ынтымақтастықты кеңейту мәселелерін талқылап, алдағы жоспарларды айқындады.
