Ондаған мың шақырым жолды артқа тастаған автошерушілер бүгін Өскеменде мәреге жетіп тоқтаты. Шығыстың бас шаһары халықаралық Mongol Rally қатысушыларын ыстық ықыласпен қарсы алып, ерекше қошемет көрсетті, деп хабарлайды F16.kz.
Әлемнің 24 елінен 106 команда (300-ден астам адам) қатысқан автошеру 13 шілде күні Чехияның астанасы Прагада басталған. Темір тұлпар тізгіндеген шабандоздар Еуропадан Азияға дейінгі ұлан-ғайыр аумақты қозғалтқыш көлемі аз көліктермен көктей өтіп, соңғы аялдама – Өскеменге тоқтады.
Mongol Rally автошеруінің бір ерекшелігі, мұнда сайыскерлер зауыттан шыққанына 30 жылдан асқан «шағын көліктермен» алыс қашықтықты жүріп өтеді және жолда кездескен барлық қиындықтарды ешкімнің көмегінсіз өздері еңсеруге тиіс. Ұйымдастырушылар тарапынан да ешқандай техникалық көмек көрсетілмейді. Сонымен қатар ралли барысында жиналған қаражаттың бір бөлігі қайырымдылық мақсаттарға жұмсалады.
Ұйымдастырушылардың айтуынша, шеруге қатысқан командалардың дені Ұлыбритания мен Италия елдерінің өкілдері.
Норвегиялық команданың бір мүшесі сапарға мотоциклмен шықты. Жолда оның көлігі төрт рет бұзылды, бірақ оны қайта жөндеп алды. Бізге көліктерді тасымалдауға көмектесетін компания бар, сондай-ақ олар логистикалық мәселелерді шешуге де қолдау көрсетеді. Бұл автошеруге қатысатын адамдар Италияда жылдан-жылға көбейіп келеді. Олар раллиге ерекше қызығушылық танытады, – деді Mongol Rally автошеруінің ұйымдастырушысы Нэйтон Хэйт.
Mongol Rally қатысушылары былтыр да Өскеменде мәреге жеткен. Шығыс жұрты осымен екінші жыл қатарынан еуропалық автошерушілерді құшақ жайып қарсы алып, жылы қабақ танытып жатыр. Қазақ елінің кең қолтық қонақжайлығы сайыскерлерге де әбден ұнаған сияқты. Олар Шығыстың әсем табиғатына тамсанып, жергілікті жұрттың меймандостығын аузының суы құрып айтады.
Мен бұл жарысқа төртінші жыл қатысып тұрмы. Біз екі мәшінмен келдік. Сапардан алған әсерім керемет, сөзбен айтып жеткізу қиын. Түрлі жолдармен жүріп, түрлі қиындықтарды еңсердік. Күш-жігердің, рухтың мықтылығы сыналды. Алдымыздан тек ақжарқын, мейірімді адамдар жолықты. Ешқандай келеңсіздік болған жоқ. Бұзылған көліктерді жолда жөндеп аламыз, – деді ирландиялық Фергал Кин.
Бұл автошеру жергілікті халық арасында да үлкен қызығушылық тудырып, өңірдің туристік және қоғамдық өміріндегі маңызды оқиғаға айналды. Биылғы финал былтырғыдан да ауқымды, былтырғыдан да жоғары деңгейде ұйымдастырылды. Ұзақ жол жүріп келген автошабандоздарды Өскеменде облыс әкімі Нұрымбет Сақтағанов күтіп алып, лебізін білдірді.
Бұл жай ғана саяхат емес, нағыз сынақ десе де болады. Шығыс Қазақстан бұрыннан әлемнің әр түкпіріндегі саяхатшыларды қызықтырады. Осындай бастамалар бізге шабыт беріп, инфрақұрылым мен сервисті жақсартуға ықпал етеді. Сіздердің сапарлар өңіріміздің байлығы мен сұлулығын, мәдени мұрасын, табиғи ресурстарын және халқымыздың қонақжайлығын әлемге танытуға мүмкіндік береді. Бұл бізді аймақты шетелдік туристер мен спорттық іс-шараларға қатысушылар үшін барынша ашық әрі тартымды етуге жігерлендіреді. Біздің өңір халықаралық туристерді қабылдауға қашан да дайын, – деді облыс әкімі Нұрымбет Сақтағанов.
Мамандардың айтуынша, мұндай іс-шаралар өңірде туризмді дамытуға және облыс имиджін халықаралық деңгейде ілгерілетуге көмектеседі. Сонымен қатар Өскеменнің белсенді туристік бағыт ретінде танылуына ықпал етеді.
