Қазақстан Ұлттық банкі 25 желтоқсаннан бастап номиналы 500 теңгелік жаңа дизайндағы банкноттарды айналысқа шығарады. Бұл туралы Ұлттық банктің баспасөз қызметі мәлім етті, деп хабарлайды F16.kz.
Жаңа ақша белгісі ұлттық мәдени мұраны дәріптейтін «Сақ стилі» сериясының бесінші банкноты болып саналады.
Жаңа банкноттар жаппай қолданысқа 2026 жылдың екінші тоқсанынан бастап кезең-кезеңімен енгізіледі. Бұл еліміздің барлық өңіріне банкноттарды жеткізу, сондай-ақ банкоматтар, терминалдар мен кассалық техникаларды жаңа форматқа бейімдеу қажеттілігімен байланысты.
Ұлттық мұра мен заманауи стиль үйлесімі
Жаңа 500 теңгелік банкноттың дизайны көшпенділер өркениетінің бай мұрасы мен қазіргі Қазақстанның бірегей болмысын айшықтайды. Банкнотта дәстүрлі қазақы ою-өрнектің негізі саналатын «Сақ стилінің» элементтері кеңінен қолданылған.
Банкноттың негізгі түсі – көк. Бет жағында:
- Көкте қалықтаған құс пен «Бәйтерек» бұтағы бейнеленген. Бұл композиция Есік қорғанынан табылған Алтын адамның бас киіміндегі әшекейлерге негізделіп, табиғат пен адам сенімінің байланысын білдіреді;
- Шексіздік символы, ол ДНҚ спиралі мен адамның табиғатпен үйлесімін меңзейтін ою-өрнекпен толықтырылған;
- Арқардың басы түріндегі әшекейдің фрагменті (Берел қорғанынан табылған, б.з.д. VIII–VII ғғ., Шығыс Қазақстан).
Банкноттың артқы жағында:
- Ою-өрнекпен көмкерілген қалқан аясында Қазақстанда мекендейтін Арқар бейнеленген;
- Артқы фонда көп мағыналы қазақы ою-өрнек орналасқан. Олар:
- «Қалқан» – ұлттық құндылықтарды қорғау белгісі,
- дүниенің төрт құбыласын білдіретін ежелгі символ,
- жасампаз энергияның нышаны ретінде бейнеленген күн белгісі;
- Банкноттың ортасында қазақы «шексіздік» ою-өрнегінің контуры салынып, оның ішінде Мұзтау тауының көрінісі бейнеленген.
Ескі және жаңа банкноттар қатар айналыста болады
Жаңа үлгідегі 500 теңгелік банкноттар 2017 жылғы үлгідегі банкноттармен қатар екі жыл бойы, яғни 2025 жылғы 25 желтоқсаннан 2027 жылғы 24 желтоқсанға дейін айналыста болады. Осы кезеңде азаматтардың ескі банкноттарды міндетті түрде айырбастауы талап етілмейді. Ескі үлгідегі ақша белгілері айналыстан біртіндеп шығарылады.
2027 жылғы 25 желтоқсаннан бастап:
- барлық екінші деңгейдегі банктер мен Қазпошта бөлімшелерінде ескі банкноттарды 2030 жылғы 24 желтоқсанға дейін жаңа үлгідегі банкноттарға айырбастауға болады;
- Қазақстан Ұлттық банкінің филиалдарында ескі банкноттар мерзімсіз айырбасталады.
Заңды төлем құралы ретінде қабылдануы міндетті
Жаңа және ескі үлгідегі 500 теңгелік банкноттар айналыста қатар жүрген кезеңде Қазақстан Республикасының бүкіл аумағында заңды төлем құралы болып саналады. Олармен барлық төлемдер мен аударымдарды жүзеге асыруға, сондай-ақ банк шоттарына ақша аударуға болады.
Ұлттық Банк заңды төлем құралы болып саналатын банкноттар мен монеталарды қабылдаудан бас тарту әкімшілік құқық бұзушылық екенін ескертеді. Мұндай әрекет Қазақстанның Әкімшілік құқық бұзушылық туралы кодексіне сәйкес жауапкершілікке әкеп соғады.
