Мәжіліс депутаты Нартай Аралбайұлы Тәуелсіз Қазақстанның жаңа Конституциясы елдегі саяси өзгерістердің заңды жалғасы екенін айтты. Оның пікірінше, жаңа Ата заң қоғам сұранысына сай әзірленіп, кең көлемде талқыланған маңызды құжат.
Депутаттың айтуынша, қолданыстағы Конституцияның қабылданғанына 30 жылға жуық уақыт өтті. Осы уақыт ішінде елде көптеген саяси және әлеуметтік өзгерістер болып, соған байланысты негізгі заңға жаңа талаптарға сай өзгерістер енгізу қажеттілігі туындаған. Нәтижесінде жаңа Конституция жобасы дайындалған.
Нартай Аралбайұлының сөзінше, құжат қысқа уақыт ішінде емес, бірнеше ай бойы жан-жақты талқыланған. Алты ай бойы ел азаматтары әр бап пен түзетуді қарастырып, өз ұсыныстарын білдірген. Сонымен қатар тікелей эфирлер арқылы да қоғам пікірі ескерілген.
Депутат жаңа Конституцияны әзірлеу жұмысына түрлі саладан 130 маман қатысқанын атап өтті. Бұдан бөлек, заңгерлер мен сарапшылардан құралған мыңға жуық адам кеңес беріп, өз ұсыныстарын жеткізген.
Ол бұрынғы Конституцияны небәрі 12 адам жазғанын, олардың қатарында үш шетелдік сарапшы болғанын еске салды. Ал қазіргі ұсынылып отырған жаңа Ата заң кең көлемде талқыланып, жан-жақты сараптамадан өткен құжат екенін айтты.
Нартай Аралбайұлы жаңа Конституцияны «халықтық Ата заң» деп атауға толық негіз бар екенін жеткізді. Оның пікірінше, бұл құжат елдегі саяси жаңғырудың маңызды кезеңін айқындайды.
Депутаттың айтуынша, жаңа Конституция – Мемлекет басшысы Қасым-Жомарт Тоқаев бастаған саяси реформалардың логикалық жалғасы. Құжатта әділетті мемлекет құру, заң мен тәртіп қағидатын күшейту, адам құқықтарын қорғау және мемлекеттік институттарды жаңғырту сияқты негізгі бағыттар қамтылған.
