Елімізде тұрғын үй құрылысын қаржыландыру жүйесінде маңызды өзгерістер енгізіліп, ипотекалық нарықтың ауқымы кеңейтілді. Бұған дейін тұрғын үй-құрылыс жинақтары тек «Отбасы банк» арқылы жүзеге асырылып келсе, енді бұл бағытқа екінші деңгейлі банктер де тартылды, деп хабарлайды F16.kz.
Жаңа заңнамаға сәйкес, коммерциялық банктер салымшылардан қаражат қабылдап, жинақталған қаржы негізінде тұрғын үй сатып алуға арналған ипотекалық несиелер ұсына алады. Бұл – нарыққа жаңа өнімдер енгізуге және қаржылық қызметтердің қолжетімділігін арттыруға мүмкіндік береді.
Дегенмен жүйеде белгілі бір айырмашылықтар сақталады. Мәселен, коммерциялық банктер арқылы ашылған жинақтарға мемлекеттік сыйақы қарастырылмаған. Ал «Отбасы банк» клиенттері бұрынғыдай жыл сайын 20 пайыз көлемінде мемлекеттік сыйақы алу мүмкіндігін сақтап қалады.
Қазақстан Республикасының Ұлттық банкі мәліметінше, енгізілген өзгерістер ипотекалық нарықтағы бәсекені арттырып, азаматтарға баспана алудың жаңа тетіктерін қалыптастыруға ықпал етеді.
Сонымен қатар бұл қадам қаржы ұйымдарының қызмет аясын кеңейтіп, тұрғын үйге қолжетімділікті арттыруға бағытталған.
Сарапшылардың пікірінше, жаңа жүйе халыққа таңдау мүмкіндігін көбейтіп, ипотекалық өнімдердің әртараптануына жол ашады.
