Шығыс Қазақстан облысы Кәсіпкерлер палатасында Nestlé компаниясы не себепті балалар тағамының кейбір түрін кері қайтарып жатқаны түсіндірілді, деп хабарлайды F16.kz.
Кәсіпкерлер палатасы баспасөз қызметінің мәліметінше, өнімді кері қайтару биылғы 5 қаңтардан басталған. Бұл жағдай Қазақстанда және өзге бірнеше елде іске асырылды. Себеп — шикізат құрамында церулид токсині болуы мүмкін деген күдік.
ШҚО санитариялық-эпидемиологиялық бақылау департаменті мамандары өнімдегі бұл заттың мөлшері өте аз және Қазақстан заңнамаларында өнім құрамындағы церулид токсиніне қатысты нақты нормативтік талаптар жоқ екенін атап өтті. Дегенмен Nestlé компаниясы корпоративтік жауапкершілік қағидатын басшылыққа алып, өнімнің белгілі бір партиясын кері қайтару туралы шешім қабылдаған. Кері қайтарылған өнімдердің үлесі аса көп емес.
Атап айтқанда, құрғақ тез еритін сүт, қышқыл сүт және лактозасыз қоспалар, сондай-ақ емдік және диеталық тамақтануға арналған аминқышқылдар негізіндегі құрғақ қоспалар бар. Нақты кері қайтарылатын партиялардың толық тізімі nestlebaby.kz ресми сайтында жарияланған. Компанияның балаларға арналған өзге өнімдері бұрынғыдай сатылып жатыр және қауіпсіз.
ШҚО Кәсіпкерлер палатасы директорының құқықтық мәселелер жөніндегі орынбасары Айжан Жангирханова палатаның негізгі міндеті – бизнесті ашық, уақтылы және сенімді ақпаратпен қамтамасыз ету екенін айтты.
Кәсіпкерлерге уәкілетті мемлекеттік органдардан ресми ақпаратты тікелей алу өте маңызды. Бұл жерде мәселе заңбұзушылықтар туралы болып тұрған жоқ, мұны компанияның корпоративтік жауапкершілігі аясында жүргізіліп жатқан ерікті қадамы деп түсіну керек, – деді ол.
