Бүгін Өскеменді тағы да түтін басты. Кеше өңір тұрғындарына қалың тұман болатыны ескертіліп, хабарлама келген. Алайда, өскемендіктер бүгін таңертең табиғи құбылыс болмағанына сенімді, деп хабарлайды F16.kz.
Шаһар тұрғындары әлеуметтік желіде даладағы жағымсыз иістен демалу мүмкін еместігін жарыса жазып жатыр.
Десе де, экологтар қалада қолайсыз метожағдай жарияланбағанын айтады.
Түнде Өскемен қаласында желдің жылдамдығы 7–8 м/с құрады, жауын-шашын мөлшері шамамен 0,5 мм болды. Жауын-шашыннан кейінгі ауаның жоғары ылғалдылығы мен температура айырмашылығының (күндіз – 18–19°С, түнде – 6–7°С) әсерінен таңертең қаланы тұман басты. Сонымен қатар мұндай жағдайлар атмосфераның жерге жақын қабатында көлік пен өнеркәсіп кәсіпорындарының шығарындыларының жиналуына ықпал етеді. Тұман кезінде ластаушы заттар баяу тарайды, бұл олардың ауада жергілікті деңгейде шоғырлануына әкелуі мүмкін, — деп атап өтті ШҚО бойынша экология департаментінің өкілдері.
